Елордада құрылыс нысандарындағы қауіпсіздік бақылауы күшейтіледі: келісімшартсыз жұмыс істеуге тыйым салынады және қызметкерлерді міндетті сақтандыру енгізіледі

 2025 жылғы 21 қазанда Басқарма басшысының төрағалығымен Полиция департаментінің, Мемлекеттік еңбек инспекциясы комитетінің, Өнеркәсіптік қауіпсіздік комитетінің және құрылыс салушылардың қатысуымен елордада құрылыс саласындағы құқықтық және қауіпсіздік мәселелеріне арналған жиналыс өтті.

 

Құрылыс – қауіпсіздік талаптарын сақтау аса маңызды болып табылатын ең қауіпті салалардың бірі.

Еңбек инспекциясының басшысы кәмелетке толмағандарды құрылыс жұмыстарына тарту жағдайларының көбейгенін атап өтті. Бұл өз кезегінде ауыр жарақаттар мен өлімге әкеліп соғуда.

 

2025 жылы елордада 40 жазатайым оқиға тіркелген. Оның 32-сі ауыр жарақат алумен, 10-ы өліммен аяқталған, соның 8-і құрылыс алаңдарында болған.

Зардап шеккендердің барлығы еңбек шартсыз жұмыс істеген.

 

Сонымен қатар, қызметкерлерді жазатайым оқиғалардан міндетті сақтандыру талаптарының сақталмау фактілері анықталды.

 

Жарақаттану деңгейін төмендету мақсатында келесі шешімдер қабылданды:

1. Бас мердігерлер қосалқы мердігерлермен жұмыс істеу кезінде қауіпсіздік талаптарының сақталуын бақылауды қамтамасыз етсін;
2. Еңбекті қорғау қызметтері бұзушылықтар жойылғанға дейін олардың жұмысын тоқтата тұрсын;
3. Қайталанған немесе өрескел бұзушылықтар анықталған жағдайда қосалқы мердігерлермен жасалған шарттар тоқтатылсын немесе бұзылсын;
4. Еңбек шарты жоқ адамдарды жұмысқа жіберуге қатаң тыйым салынады және олардың Enbek.kz жүйесіне енгізілуі бақылансын;
5. Барлық мердігерлер қызметкерлерін жазатайым оқиғалардан міндетті сақтандыру шартын жасасуға міндетті.

 

Бұл шаралар құрылыс нысандарындағы жұмысшылардың қауіпсіздігін арттыруға және олардың құқықтарын қорғауға бағытталған.