Мұз үстіндегі қауіпсіздік: жұқа мұздан сақтану жолдары.

Қыс мезгілінде көптеген адамдар мұз үстінде серуендеп, балық аулап немесе сырғанақ теуіп уақыт өткізуді ұнатады. Алайда, жұқа мұздың астында қалу қаупі жоғары, бұл адам өміріне үлкен қауіп төндіреді. Мұз үстінде қауіпсіздік ережелерін сақтау өте маңызды.

 

Қауіпсіз мұзды қалай анықтауға болады?

 

1.Мұздың түсі:

•Мықты мұз әдетте көкшіл немесе жасылдау түсті болады.

•Ақ мұз әлсіздеу келеді, себебі оның ішінде ауа көп.

•Сұр немесе сарғыш мұз өте қауіпті — мұндай мұздың беріктігі жоқ.

2.Мұздың қалыңдығы:

•Бір адам үшін қауіпсіз мұздың қалыңдығы кемінде 10 см болуы керек.

•Бірнеше адам немесе техника үшін мұз қалыңдығы 20 см-ден асуы қажет.

3.Жыл мезгіліне назар аударыңыз:

•Қыс мезгілінің басында және көктемде мұз ерекше қауіпті, өйткені ол әлсіреп, сынып кетуге бейім болады.

 

Сақтық шаралары

 

1.Белгісіз жерлерге шықпаңыз: тексерілген және қауіпсіз екені дәлелденген жерлерді таңдаңыз.

2.Жалғыз шықпаңыз: егер мұз жарылып кетсе, сізге көмек көрсету мүмкіндігі азаяды.

3.Құтқару құралдарын алыңыз:

•Ұзындығы 10–15 метр арқан (ұшына ауыр зат байланған).

•Шеге немесе өткір құралдар (мұзға жабысып шығуға көмектеседі).

•Егер мүмкіндік болса, құтқару кеудешесін киіңіз.

4.Жылы әрі қабат-қабат киініңіз: бұл суық суға түскенде дене температурасын ұзақ сақтауға көмектеседі.

5.Мұзды аяқпен немесе ауыр затпен ұрмаңыз: бұл мұздың сынуына әкелуі мүмкін.

 

Егер мұз жарылып кетсе

 

1.Сабыр сақтаңыз: дүрбелеңге салынбаңыз және артық қозғалыс жасамаңыз.

2.Қолдарыңызды екі жаққа жайыңыз: бұл сіздің мұз астына толықтай кетуіңізге жол бермейді.

3.Өзіңіз келген жаққа қарай жылжыңыз: ол жерде мұз сіздің салмағыңызды көтерген.

4.Жатып шығыңыз: шынтақпен немесе шеге сияқты құралдармен көтерілуге тырысыңыз.

5.Құтқарылғаннан кейін жылынып, дәрігерге қаралыңыз.

 

Егер басқа біреуге көмек көрсету керек болса

 

1.Мұзға жүгіріп бармаңыз: сіз де суға түсіп кетуіңіз мүмкін.

2.Төтенше жағдай қызметіне қоңырау шалыңыз (112).

3.Қолда бар құралдарды пайдаланыңыз: зардап шеккен адамға арқан, таяқ, белбеу немесе тақтай беріңіз.

4.Қауіпсіз қашықтықта болыңыз: көмек көрсеткенде мұз үстінде жатып әрекет етіңіз.

 

Балаларға ерекше назар аударыңыз

 

Ата-аналар балаларға мұздың қауіпті екенін түсіндіруі керек. Оларды ересектердің қарауынсыз мұзға жібермеңіз және мұз үстінде ойнауға тыйым салыңыз.

 

Мұз үстінде қауіпсіздік ережелерін елемеу ауыр зардаптарға әкелуі мүмкін. Табиғатқа құрметпен қарап, өз өміріңіз бен жақындарыңыздың қауіпсіздігін қамтамасыз етіңіз. Қауіпсіздікке бейжай қарамаңыз!