Банктер туралы жаңа Заң жобасын жария талқылауға шығару туралы
Қаржы нарығын реттеу және дамыту агенттігі «Қазақстан Республикасындағы банктер және банк қызметі туралы» және «Қазақстан Республикасының кейбір заңнамалық актілеріне қаржы нарығын реттеу мен дамыту мәселелері бойынша өзгерістер мен толықтырулар енгізу туралы» Қазақстан Республикасы Заңдарының жобаларын әзірледі.
Заң жобалары Мемлекет басшысының 2024 жылғы 2 қыркүйектегі «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан Республикасы халқына Жолдауы аясында айтылған тапсырмаларын орындау мақсатында әзірленді.
Заң жобалары экономикалық белсенділікті ынталандырудың өзекті мәселелерін шешуге және финтех секторын одан әрі дамытуға бағытталған.
Заң жобаларының негізгі бағыттарына:
- Банк секторындағы бәсекелестікті кеңейту және шағын және орта бизнесті кредиттеудің өсуіне жағдай жасау үшін базалық және әмбебап банк лицензиясын енгізу.
- Қаржы нарығында финтех секторды дамыту және банктердің финтех компанияларының капиталына қатысу мүмкіндіктерін кеңейту және «реттеу құмсалғышына» жеңілдетілген қолжетімділікті қамтамасыз ететін инновацияларды қауіпсіз енгізу.
- Артық және ескірген ережелерді жоюға, ұқсас талаптарды біріктіруге, сондай-ақ корпоративтік басқару талаптарын күшейтуге, дәлелді пайымдауларды қолдану аясын кеңейтуге және қадағалау құралдарының құрылымын оңтайландыруға бағытталған банктік реттеуді жетілдіру.
- Исламдық қаржыландыруды дамыту және дәстүрлі банктерге үздік халықаралық тәжірибеге сәйкес келетін бір лицензия бойынша исламдық қаржы өнімдерін ұсынуға мүмкіндік беру.
- Мінез-құлықты қадағалауды дамыту. Тұтынушылардың құқықтарын қорғауды күшейту, өтініштерді қараудың үш деңгейлі жүйесін енгізу, қаржы институттарының ашықтығы мен жауапкершілігін арттыру.
- Банк жүйесінің тұрақтылығын арттыру мақсатында төлемге қабілетсіз банктерді реттеу жүйесін реформалау және тұтынушылардың құқықтарын қорғауды күшейту қарастырылған.
Төлемге қабілетсіз банктердің есеп айырысуларында мемлекет қаражатын пайдалану шарттарын қатаңдату ұсынылады. Жүйелік маңызы бар банктерге қатысты ерекше жағдайларда мемлекеттік қолдау көрсету көзделуде.
Заң жобалары «Қазақстан Республикасы Үкіметінің заң жобалау жұмысының қағидаларын бекіту туралы» Қазақстан Республикасы Үкіметінің 2016 жылғы 29 желтоқсандағы №907 қаулысына сәйкес әзірленді.
Заң жобаларының мәтінімен Агенттіктің интернет-ресурсында танысуға болады.
Сыртқы коммуникациялар басқармасы