Есірткі құралдарының және цифрлық активтердің заңсыз айналымы саласында банк қызметтерін пайдалану тәуекелдерін азайту жөніндегі шараларды күшейту туралы
Қазақстан Республикасының Қаржы нарығын реттеу және дамыту агенттігі (бұдан әрі - Агенттік) «Қазақстан Республикасының кейбір нормативтік құқықтық актілеріне қаржы ұйымдарының қызметін реттеу мәселелері бойынша өзгерістер енгізу туралы» Агенттік Басқармасының 2024 жылғы 31 желтоқсандағы № 96 қаулысын қабылдады.
Есірткі құралдарының және цифрлық активтердің заңсыз айналымы саласында банк қызметтерін пайдалану тәуекелдерін барынша азайту мақсатында Қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мақсатында ішкі бақылау қағидаларына қойылатын талаптарға[1] және Екінші деңгейдегі банктерге, Қазақстан Республикасының бейрезидент-банктерінің филиалдарына арналған тәуекелдерді басқару және ішкі бақылау жүйесін қалыптастыру қағидаларына[2] мынадай түзетулер енгізілді:
- қаржылық мониторингті жүзеге асыратын мемлекеттік орган бекіткен, қылмыстық кірістерді заңдастыру (жылыстату) және терроризмді қаржыландыру типологияларына, схемалары мен тәсілдеріне сәйкес келетін сипаттамалары бар операцияларды анықтауды автоматтандыру бойынша банктерге:
1) есірткіні заңсыз өндіру, айналымы және (немесе) транзитімен;
2) тізбесін уәкілетті орган қалыптастыратын «Астана» халықаралық қаржы орталығының қатысушылары болып табылмайтын цифрлық активтер биржаларының пайдасына төлемдер мен ақша аударымдарын жүзеге асырумен;
3) электрондық казино мен интернет-казиноның пайдасына төлемдер және (немесе) ақша аударымдарын жүзеге асырумен байланысты қойылатын талаптар белгіленді.
- Қазақстан Республикасының бейрезиденттері үшін төлем карточкаларының қолданыс мерзімі бойынша – 12 ай шектеулер белгіленді.
- бір клиентке төлем карталарының саны қысқартылды.
Қаулының толық мәтінімен Агенттіктің интернет-ресурсынан және «Әділет» ақпараттық-құқықтық жүйесі сайтынан танысуға болады.
Сыртқы коммуникациялар басқармасы
[1] «Қылмыстық жолмен алынған кірістерді заңдастыруға (жылыстатуға), терроризмді қаржыландыруға және жаппай қырып-жою қаруын таратуды қаржыландыруға қарсы іс-қимыл жасау мақсатында ішкі бақылау қағидаларына қойылатын талаптарды бекіту туралы» Қазақстан Республикасы Қаржы нарығын реттеу және дамыту агенттігі Басқармасының қаулылары (Агенттік Басқармасының 2020 жылғы 22 наурыздағы № 18, 2020 жылғы 12 қазандағы № 95, 2020 жылғы 12 қазандағы № 96, 2020 жылғы 12 қазандағы № 97, 2020 жылғы 12 қазандағы № 98, 2020 жылғы 29 қазандағы № 105 қаулылары)
[2] «Екінші деңгейдегі банктерге, Қазақстан Республикасының бейрезидент-банктерінің филиалдарына арналған тәуекелдерді басқару және ішкі бақылау жүйесін қалыптастыру қағидаларын бекіту туралы» Қазақстан Республикасы Ұлттық Банкі Басқармасының 2019 жылғы 12 қарашадағы № 188 қаулысы