«Микрофинансовая организация «i-credit.kz» ЖШС-ны лицензиясынан айыру туралы
Қазақстан Республикасы Қаржы нарығын реттеу және дамыту агенттігінің (бұдан әрі – Агенттік) Алматы қаласындағы өңірлік өкілдер басқармасы бастығының 21.12.2023 жылғы № 121 бұйрығына сәйкес
«Микрофинансовая организация «i-credit.kz» жауапкершілігі шектеулі серіктестігі (бұдан әрі – МҚҰ) микроқаржылық қызметті жүзеге асыруға берілген лицензиясынан айырылды.
«Микроқаржылық қызмет туралы» Қазақстан Республикасы Заңының 16-бабы 2-тармағының 2) тармақшасына сәйкес лицензиядан айыруға қызметін Қазақстан Республикасы заңдарының талаптарын, сондай-ақ уәкілетті органның, Қазақстан Республикасы Ұлттық Банкінің нормативтік құқықтық актілерін жүйелі түрде (қатарынан күнтізбелік он екі ай ішінде үш және одан көп рет) бұза отырып жүзеге асыру негіз болды.
МҚҰ қатарынан күнтізбелік он екі ай ішінде:
- анық емес есептілікті ұсыну;
- меншікті капиталдың жеткіліктілігі коэффициентінің пруденциялық нормативін бұзу;
- микрокредит беру туралы шарттың үлгілік нысаны мазмұнының заңнама талаптарына сәйкес келмеуі;
- қарыз алушының борыш жүктемесінің коэффициентін есептеу тәртібін бұзу;
- берілген микрокредиттер бойынша жылдық тиімді сыйақы мөлшерлемесінің шекті мөлшерінен асып кету;
- кредиттік бюроға мәліметтерді ұсыну тәртібін бұзу;
- оны жариялау күнгі жағдай бойынша шындыққа сәйкес келмейтін МҚҰ қызметінің жарнамасын орналастыру түрінде көрінген бұзушылықтарға жол берген.
«Микроқаржылық қызмет туралы» Қазақстан Республикасы Заңының 16-бабы 9-тармағының талаптарына сәйкес МҚҰ Агенттік микроқаржылық қызметті жүзеге асыруға лицензиядан айыру туралы шешім қабылдаған күннен бастап күнтізбелік отыз күн ішінде өзінің атауынан «микроқаржы ұйымы» деген сөздерді, олардан туындайтын, көрсетілген заңды тұлғаның микрокредиттер беру жөніндегі қызметті жүзеге асыруын болжайтын сөздерді немесе аббревиатураларды алып тастау арқылы қайта тіркеу рәсімін жүргізуге не қайта ұйымдастыру немесе тарату туралы шешім қабылдауға міндетті.
Микрокредит беру туралы шарттар бойынша орындалмаған міндеттемелері бар МҚҰ клиенттері микрокредит беру туралы жасалған шарттардың талаптарына сәйкес МҚҰ алдындағы міндеттемелерінің орындалуын бұзғаны үшін жауапкершілік атқарады.
Сыртқы коммуникациялар басқармасы
+7 (727) 237 1089, press@finreg.kz