Смартфонның қауіпсіздігі: тексеру қажет 10 баптау
Смартфон банктік қосымшаларға, электрондық поштаға, әлеуметтік желілерге және басқа да цифрлық сервистерге қол жеткізу үшін пайдаланылады. Сонымен қатар құрылғыда жеке және қаржылық деректер сақталуы мүмкін. Сондықтан смартфонның базалық қорғанысын қамтамасыз етіп, қауіпсіздік баптауларын жүйелі түрде тексеріп отырған маңызды.
Экранды бұғаттаудың сенімді жолын орнатыңыз: күрделі PIN кодын, құпиясөзді немесе биометриялық аутентификацияны пайдаланыңыз. Қарапайым комбинацияларды, туған күндерді және басқа да оңай болжанатын мәндерді пайдаланбаңыз.
Экранды автоматты түрде бұғаттауды қосыңыз: экранды автоматты түрде бұғаттаудың қысқа мерзімін орнатыңыз. Сондай-ақ бұғатталған экрандағы хабар мазмұнын және басқа құпия ақпаратты көрсетуді өшіру ұсынылады.
Құрылғыны іздеу функциясын қосу: Android үшін Find My Device («Құрылғыны табу»), iPhone үшін - Find My («Локатор»). Функцияның белсенді екенін және есептік жазбамен байланысты екенін тексеріңіз. Бұл құрылғының орналасқан жерін анықтауға, оны бұғаттауға немесе қажет болған жағдайда деректерді жоюға мүмкіндік береді.
Жаңартуларды орнату: операциялық жүйе мен қолданбалардың жаңартуларын уақтылы орнатыңыз. Олар қауіпсіздік осалдықтарын түзетуді қамтуы мүмкін. Мұндай мүмкіндік болса, автоматты түрде жаңартуды қосыңыз.
Қолданбаның рұқсаттарын тексеріңіз: қолданбалардың микрофонға, камераға, геолокацияға, контактілерге, фотосуреттерге, файлдарға, SMS және басқа да функцияларға қолжетімділігін ұдайы тексеріңіз. Қолданбаны іске қосу үшін талап етілмейтін рұқсаттарды ажыратыңыз.
Ресми көздерден қолданбаларды орнатыңыз: Google Play және App Store бағдарламаларын пайдаланыңыз. SMS, мессенджерлер, электрондық пошта немесе беймәлім сайттардан сілтемелер арқылы бағдарламаларды орнатпаңыз.
Қолданбаны төлем алу, банктік шотты қорғау, құжаттарды тексеру немесе техникалық қолдау көрсету деген сылтаумен орнатуды ұсынса, ерекше сақтық таныту қажет.
Екі факторлы аутентификацияны қосыңыз: электрондық поштаны, әлеуметтік желілерді, бұлттық сервистерді және басқа да маңызды аккаунттарды қорғау үшін екі факторлы аутентификацияны міндетті түрде қолданыңыз. Негізгі Google немесе Apple аккаунтына ерекше назар аудару қажет, себебі олар арқылы смартфон деректерінің басым бөлігіне рұқсатсыз қол жеткізу тәуекелі жоғары.
Мүмкіндігінше, аутентификатор қолданбасын немесе аппараттық қауіпсіздік кілтін пайдаланыңыз.
Резервтік көшірме жасауды тексеріңіз: маңызды деректерді резервтік көшіру функциясының қосулы екеніне көз жеткізіңіз. Резервтік көшірмелер сақталатын аккаунт та сенімді құпиясөзбен және екі факторлы аутентификациямен қатаң түрде қорғалуға тиіс.
Сымсыз қосылымдарды бақылаңыз: беймәлім Wi-Fi желілеріне қосылуға және бейтаныс Bluetooth қосылымдарын растауға үзілді-кесілді тыйым салынады. Қоғамдық Wi-Fi желілерін пайдалану кезінде құпия деректерді енгізуден және қажеттіліксіз қаржылық операцияларды жүргізуден аулақ болыңыз.
Кеңейтілген құқықтары бар қолданбаларды тексеріңіз: Android операциялық жүйесінде жекелеген қолданбалар арнайы құқықтарға, соның ішінде арнайы мүмкіндіктерге қол жеткізу, беймәлім қолданбаларды орнату және басқа терезелердің үстінен көрсетілу құқықтарына ие бола алады.
Мұндай рұқсаттарды тек сіз сенім білдіретін және олардың жұмыс істеуі үшін осы функциялар тікелей қажет болатын қолданбаларға ғана беріңіз. Кеңейтілген құқықтары бар беймәлім қолданбаларды тексеру және қажеттілік туындаған жағдайда оларды жою міндетті.
Пайдаланылмайтын қолданбаларды жою, орнатылған бағдарламалардың тізімін және аккаунттардың белсенді сеанстарын тексеру, беймәлім құрылғылардағы сеанстарды аяқтау, үшінші тұлғаларға SMS-хабарламалар мен хабарландырулардан алынған кодтарды бермеу, сондай-ақ бейтаныс тұлғалардың нұсқауы бойынша қолданбаларды орнатпау және смартфонға қашықтан қол жеткізу құқығын ұсынбау талап етіледі.
Маңызды: банктердің, мемлекеттік органдардың және басқа да ұйымдардың қызметкерлері азаматтардан SMS немесе хабарландырулар арқылы келетін растау кодтарын сұратуға құқылы емес.
Смартфонның қауіпсіздігі – бұл бір ғана баптау емес, деректеріңізді, аккаунттарыңыз бен қаражатыңызды қорғауға мүмкіндік беретін қарапайым шаралардың жиынтығы екенін есте сақтаңыз. Тіпті ең заманауи қорғаныс құралдары да пайдаланушының қырағылығын алмастыра алмайды.
Толығырақ пайдалы материалдармен Fingramota.kz интернет-ресурсында танысуға болады.
Сыртқы коммуникациялар басқармасы