«Дәстүрден сәнге: “Даналық мектебі” эфир төрінде»

 

Аққулы ауданы Потанин жалпы орта білім беру мектебінің «Даналық мектебінің» мүшелері Павлодар қаласындағы «Ертіс» телеарнасының арнайы шақыртуымен эфир қонағы болды. Бұл – мектеп қабырғасында жүзеге асып жатқан тәрбиелік және шығармашылық жұмыстардың нәтижесін көпшілікке таныстыруға берілген тамаша мүмкіндік.

Эфир барысында «Даналық мектебінің» жұмысы, оның негізгі бағыты мен маңызы кеңінен сөз болды. Аталған мектеп – ұлттық құндылықтарды дәріптеуді, оқушыларға тағылымды тәрбие беруді және қолөнер арқылы эстетикалық талғамды қалыптастыруды мақсат етеді.

Бағдарлама қонақтары Хамитова Тілектес Хасенгалиевна мен Мустафина Еркежан Каирбековна өздерінің тәжірибелерімен бөлісіп, атқарылып жатқан жұмыстарға тоқталды. Олар ұлттық нақыштағы бұйымдарды жаңғырту арқылы жас ұрпақтың қызығушылығын арттырудың маңыздылығын атап өтті.

Эфир барысында көрермендерге «этно стильдегі түйреуіштер» таныстырылды. Қолдан жасалған бұл әшекей бұйымдар қазақтың ою-өрнектерімен безендіріліп, ұлттық нақыш пен заманауи сәннің үйлесімін көрсетті. Шеберлер әр бұйымның жасалу жолын түсіндіріп, оның тәрбиелік әрі мәдени мәніне ерекше тоқталды.

Бағдарлама жылы әрі әсерлі форматта өтіп, көрермендерге ұлттық өнердің заманауи бағытта дамып келе жатқанын көрсетті. Бұл эфир – ұлттық мұраны дәріптеудің, қолөнерді насихаттаудың және жас ұрпақты өнерге баулудың жарқын үлгісі болды.

Қорыта айтқанда, «Даналық мектебінің» эфирге шығуы – білім мен тәрбиені, өнер мен ұлттық құндылықтарды ұштастырған маңызды жетістік.