Ақмола жеріне деген адалдықтың 46 жылы: бас агроном Светлана Орехова саналы ғұмырын саланың дамуына арнады
Светлана Юрьевна Орехова өмірінің жарты ғасырға жуық уақытын аграрлық салаға арнады. Оның есімі бүгінде Ақмола облысындағы ауыл шаруашылығы саласында кәсібилік пен адалдықтың символына айналған. Еңбек жолын Арқалық ауданының «Целинный» кеңшарында бастаған ол соңғы 22 жыл бойы Жарқайың ауданындағы «Жер-1» ЖШС тұқым шаруашылығының агрономиялық қызметін басқарып келеді.
1991 жылы Целиноград ауыл шаруашылығы институтын «ғалым-агроном» мамандығы бойынша тәмамдаған. Десе де, агрономия саласындағы шынайы еңбек жолы әлдеқайда ерте – 1978 жылы басталған. Сол уақыттан бері ол тек заман ағымына ілесіп қана қоймай, өзі де саланың дамуына серпін берді – пестицидтермен тәжірибе жасап, зығыр, қарақұмық, күнбағыс секілді жергілікті жағдайға бейімделген жаңа сорттарды енгізіп, аймақтағы егіншілік саласында тың серпіліс жасады.
Светлана Юрьевна А.Бараев атындағы астық шаруашылығы ғылыми-зерттеу институтымен және Қарабалық ауыл шаруашылығы тәжірибе станциясымен тығыз байланыс орната білді. Оның басшылығымен «Жер-1» шаруашылығы алғашқылардың бірі болып жетілдірілген бидай сорттарын тәжірибеге енгізіп, бүгінде ол сорттар тек өз шаруашылықтарында ғана емес, бүкіл аудан аумағында кеңінен егілуде.
Светлана Орехованың тәжірибесі мен білімін тек әріптестері ғана емес, аймақтан тысқары жерлерде де жоғары бағалайды. «Жер-1» элиталық шаруашылығының тұқымдарын Ақмола мен Қостанай облыстарының диқандары да белсенді қолдануда. Ол өз үлгісімен жас мамандарды қанаттандырып, болашақ отандық егіншіліктің негізін қалап келеді.
«Жермен жұмыс істеу – бұл жай ғана мамандық емес, бұл жан дүниеңнің бір үлкен бөлігі деп білемін. Мен бала кезімнен-ақ болашағымды егінмен, дала жұмысымен байланыстыратынымды білдім. Әр маусым – жаңа тыныс, жаңа үміт сияқты», – деп бөлісті Светлана Орехова.
Кәсіпке деген адалдығы үшін Светлана Орехова «Құрмет» орденімен және «Қазақстан Республикасы Тәуелсіздігінің 20 жылдығы» мерейтойлық медалімен марапатталған. Алайда ол үшін ең үлкен марапат – әріптестерінің сенімі мен жыл сайынғы жоғары өнім көрсеткіштері. Бұл жетістіктердің артында толассыз еңбек пен мол тәжірибе, туған жерге деген шексіз махаббат жатыр.