Ақмола облысында соғыс ардагері Арсений Андреевич Щудляктың 100 жылдық мерейтойы аталып өтті

22 наурызда, Наурыз мерекесінде, Ұлы Отан соғысының ардагері Арсений Андреевич Щудляк өз ғасырлық мерейтойын атап өтті. Салтанатты шара Бурабай ауданының Щучинск қаласында өтіп, ардагерді әскери оркестрдің сүйемелдеуімен құттықтады.

Ақмола облысының әкімі Марат Ахметжанов Қазақстан Республикасының Президенті Қасым-Жомарт Кемелұлы Тоқаевтың құттықтау хатын оқып, ардагердің Жеңіске қосқан өлшеусіз үлесі мен елдің бейбіт болашағы үшін жасаған ерлігіне терең алғыс білдірді.

Арсений Андреевич Щудляк 1925 жылы 22 наурызда Украин КСР-нің Каменец-Подольск облысы, Карытно ауылында дүниеге келген. 1935 жылы отбасымен бірге Қазақстанға қоныс аударды. 16 жасында ағаш ұстасының шәкірті болып еңбек жолын бастады, ал 1943 жылдың ақпанында, 18 жасқа толғанда, майданға шақырылды.

127-атқыштар полкінде қызмет етіп, соғысты бастан-аяқ өтті. 1945 жылдың тамыз-қыркүйек айларында жапон әскерімен шайқастарға атқыш ретінде қатысты. 1945 жылдың қарашасынан 1946 жылдың наурызына дейін 18-мотоатқыштар бригадасында қызметін жалғастырды.

Ерлігі мен Отанға адалдығы үшін II дәрежелі «Отан соғысы» орденімен, Георгий Жуков медалімен, «Германияны жеңгені үшін», «Жапонияны жеңгені үшін» медальдарымен, сондай-ақ «КСРО Қарулы Күштеріне 60 жыл» мерейтойлық медалімен марапатталды.

Демобилизациядан кейін Арсений Андреевич Щучинск қаласындағы теміржол әскери күзетінде қарауыл бастығы болып жұмыс істеді. 1985 жылы құрметті демалысқа шықты.

Бүгінде мерейтой иесі жақындарының қамқорлығы мен сүйіспеншілігіне бөленуде. Ол – үш баланың әкесі, алты немеренің атасы және тоғыз шөберенің ардақты арғы атасы.