Жақсы ауылында дене шынықтыру-сауықтыру кешені ашылды

Ақмола облысының Жақсы ауылында дене шынықтыру-сауықтыру кешені ашылды. Жақсы ауданының тұрғындарын айтулы жаңалықпен Ақмола облысының әкімі Марат Ахметжанов құттықтады.

«Жаңа дене шынықтыру-сауықтыру кешені ауданда жеке бассейні бар алғашқы спорт нысанына айналды. Енді аудан орталығының тұрғындары жыл бойы жүзумен айналысып, денсаулығын нығайтып, белсенді өмір салтын ұстануға мүмкіндік алды. Бұл әсіресе балалар мен жастар үшін маңызды. Оларға үлгі боларлық жерлестеріміз бар. Жақында Жапонияда өткен XX жазғы Азия ойындарында жерлесіміз Шыныбаев Қыдырбек ММА бойынша жарыста алтын медаль жеңіп алды. Ал Арлан Жанабай ерлер арасындағы жеке триатлон сайысында қола медаль иеленді», – деді Марат Ахметжанов.

Көпфункционалды спорт залында футбол, баскетбол, волейбол сияқты ойын түрлерімен айналысуға жағдай жасалған. Күш жаттығуларын ұнататындар үшін тренажер залы да қарастырылған.

Облыс әкімі Жақсы ауданының жоғары нәтижелерге қол жеткізген спортшыларымен дәстүрлі түрде танымал екенін атап өтті. Республикалық, Азия және әлемдік ареналарда грек-рим күресінен Азия чемпиондары мен жүлдегерлері Дамир Зарлыханов, Азиз және Ислам Гасымовтар, сондай-ақ әйелдер арасында бокстан әлем чемпионы Дина Жоламан және басқа да талантты атлеттердің есімдері кеңінен танымал.

Сондай-ақ жұмыс сапары барысында Марат Ахметжанов жаңартылған теміржол вокзалының жұмысымен танысты. Қайта жаңғырту кезінде ғимараттың қасбеті мен шатыры, инженерлік желілері және ішкі әрлеуі толықтай жаңартылды. Мүмкіндігі шектеулі азаматтарға қолайлы жағдай жасауға да ерекше назар аударылды.

Наурыз айынан бастап вокзалда тағы бір жолаушылар пойызы аялдайтын болды. Қазір мұнда бес пойыз тоқтайды, тәулігіне шамамен 80 адам қызмет көрсетіледі.