Шортанды ауданының Күлшін ауылында алғаш рет орталықтандырылған ауыз су жүйесі іске қосылды
Шортанды ауданының Күлшін ауылында тұрғындар алғаш рет орталықтандырылған ауыз сумен қамтамасыз етілді. Ақмола облысының әкімі Марат Ахметжанов Шортанды ауданына жұмыс сапары барысында Ключи ауылындағы су құбыры мен тарату желілерінің құрылыс нысанын аралады.
«Жоба аясында ұзындығы 21 шақырым болатын су құбыры тартылып, екі пайдалану ұңғымасы бұрғыланды. Сонымен қатар, ауылішілік 9 шақырым су желісі салынды. Орнатылған резервуарлардың жалпы көлемі 500 текше метрді құрайды, бұл ауыл тұрғындарының қажеттілігін толық қамтамасыз етеді», – деді «Альянс Ltd» ЖШС директоры Аманқос Исағалиев.
Өңір басшысы жобаның іске асырылу қорытындыларымен танысып, жергілікті тұрғындармен әңгімелесті. Сондай-ақ алғашқылардың бірі болып краннан су ішіп көріп, оның тазалығы мен дәмдік сапасын атап өтті. Айта кету керек, ауыз сумен тек тұрғын үйлер ғана емес, жақында салынған фельдшерлік-акушерлік пункт те қамтамасыз етілген. Бұған облыс әкімі жеке көз жеткізді.
Ауыл тұрғындарының айтуынша, олар ұзақ жылдар бойы орталықтандырылған су жүйесінің іске қосылуын күткен. Тұрғындар бұл жоба көптеген тұрмыстық мәселелерді шешіп, халықтың өмір сапасын айтарлықтай жақсартатынын атап өтті.
«Ауылдық елді мекендерді сапалы ауыз сумен қамтамасыз ету – Мемлекет басшысы қойған негізгі міндеттердің бірі. Ключи ауылындағы су жүйесінің іске қосылуы – мемлекеттік органдар мен мердігер ұйымдардың жүйелі жұмысының нәтижесі. Біздің міндетіміз – ауыл тұрғындарын өмір сүру сапасы мен жайлылығына тікелей әсер ететін қолжетімді әрі сапалы инфрақұрылыммен қамтамасыз ету», – деп атап өтті облыс әкімі.
Орталықтандырылған су жүйесінің іске қосылуы инвестиция тартуға да серпін берді. Мұнда екі ірі инвестициялық жобаны жүзеге асыру жоспарланған. Кәсіпкерлер өз жобаларын Марат Ахметжановқа таныстырды.
«Күлшін су өнімдері» ЖШС-нің минералды су өндіретін зауытын Күлшін ауылында 2028 жылға дейін салу жоспарлануда. Кәсіпорын жергілікті тұрғындарды тұрақты жұмыс орындарымен қамтамасыз етіп, бөтелкедегі ауыз су мен құрамында шырыны бар сусындар шығаратын болады.
Q-TEC өнеркәсіптік кешені ысырма арматурасын, сорғы жабдықтарын, ауыл шаруашылығы техникаларын және құбыр өнімдерін шығаруға бағытталған. Өндіріс орнында 600-ден астам тұрақты жұмыс орны ашылады. Кәсіпорын толық қуатына 2032 жылы шығады деп жоспарлануда. Өнімнің экспорттық әлеуеті жоғары, оған Әзірбайжан, Түрікменстан, Өзбекстан және басқа да ТМД елдерінің нарықтарында сұраныс бар.
«Мұндай кәсіпорындар ауылдардың дамуына үлкен серпін береді. Өндірісті қолдау, жайлы инфрақұрылым қалыптастыру және жұмыс күшін тарту халық санының өсуіне ықпал етеді. Ал бұл өз кезегінде ауылдың болашағын сақтауға мүмкіндік береді», – деп атап өтті өңір басшысы.