Ақмола облысының мектеп оқушылары үшін соңғы қоңырау соғылды
Оқу жылы Ақмола облысындағы 523 мектепте 140,5 мың оқушы үшін аяқталды. «Алтын белгі» белгісіне 441 түлек, ал үздік аттестатқа 495 оқушы үміткер. 25 мамыр күні облыстың барлық мектептерінде «Білім – Отаныма!» тақырыбында республикалық сынып сағаттары өтуде. Онда «Адал азамат» бірыңғай тәрбиелік бағдарламасының құндылықтарына, сондай-ақ жаңа Конституцияның басым стратегиялық бағыттарына – білім мен ғылымды дамытуға ерекше назар аударылады.
Оқу жылының аяқталуымен Целиноград ауданы Талапкер ауылының гимназия оқушыларын Ақмола облысының әкімі Марат Ахметжанов пен Оқу-ағарту министрі Жұлдыз Сүлейменова құттықтады.
Түлектер алдында сөз сөйлеген Марат Ахметжанов білімді, жауапты әрі патриот ұрпақ тәрбиелеудегі мектептің ерекше рөлін атап өтті.
«Бүгінде өңірде сапалы білім алуға барлық жағдай жасалып отыр, мектептердің инфрақұрылымы жаңғыртылуда, заманауи білім беру технологиялары енгізілуде, дарынды ұстаздар мен олардың шәкірттері қолдау табуда. Талапкерде олардың қатары аз емес: оқушылар білім, шығармашылық және спорт салаларында жетістіктерге жетіп жүр», – деді өңір басшысы.
Оқу-ағарту министрі Жұлдыз Сүлейменова түлектерді оқу жылының аяқталуымен құттықтап, оларға өз мақсаттарына нық қадам басып, жоғары нәтижелерге жетуді және туған жері мен елін лайықты түрде таныстыруды тіледі. Ол қазіргі қоғамның басты құндылықтары – білім, еңбекқорлық және даму ұмтылысы екенін атап өтті.
Түлектер ұстаздары мен ата-аналарына қолдау мен тәлімгерлігі үшін алғыс білдірді. Дәстүр бойынша соңғы қоңырау соғылып, оқушылар қоштасу вальсін және басқа да шығармашылық нөмірлерді орындады.
Салтанатты жиыннан кейін Жұлдыз Сүлейменова мектеп-гимназияның педагогикалық ұжымымен кездесіп, білім беру жүйесіндегі өзгерістер туралы айтып берді және мұғалімдердің сұрақтарына жауап берді.
Айта кетейік, Талапкер ауылының мектеп-гимназиясы 2024 жылы «Келешек мектептері» жобасы аясында салынған. Оқу орнында 65 педагог жұмыс істейді, шамамен 600 оқушы білім алады. Биыл 32 түлектің ішінде 2 оқушы «Алтын белгіге», 3 оқушы үздік аттестатқа үміткер.