«БІЗ – АБАЙ ЖОЛЫНДАМЫЗ!» РЕСПУБЛИКАЛЫҚ БАЙҚАУЫНЫҢ ЖЕҢІМПАЗДАРЫ МАРАПАТТАЛДЫ

Жақында Ақмола облысы «Рухани жаңғыру» өңірлік жобалық кеңсесі мен Ақмола облыстық Оқу-әдістемелік орталығының ұйымдастыруымен өткізілген республикалық «БІЗ – АБАЙ ЖОЛЫНДАМЫЗ!» онлайн эссе байқауының жеңімпаздарын марапаттау рәсімі өтті.

Байқау қатысушылары жазушы Мұхтар Әуезовтің "Абай жолы" роман-эпопеясының бірінші томын оқып шығулары қажет болды. Нәтижесінде 20 қатысушы байқаудың финалдық кезеңіне жолдама алды. Байқаудың қорытынды кезеңіне Ақмола, Солтүстік Қазақстан, Алматы облыстары мен Көкшетау, Нұр-Сұлтан, Шымкент қалаларының жастары қатысты. Байқау екі тілде өтті. Қатысушылар Ақмола облыстық Оқу-әдістемелік орталығының вебинарына Zoom мобильдік қосымшасы арқылы қосылды, оның барысында "Абай жолы" романы бойынша 45 минут ішінде "Атаның ұлы емес, елінің ұлы", «Духовная натура поэта и мелодия любви» тақырыптарына эссе жазды.

Қазақ тілінде жазылған эсселер арасында І орынды иеленген жас эссеист ЕРДЕН НҰРАХМЕТТІҢ «топжарғанынан» сіздерге үзінді ұсынуды жөн көріп отырмыз.

...Дана қазақ «АТАНЫҢ БАЛАСЫ БОЛМА, АДАМНЫҢ БАЛАСЫ БОЛ» деген. Бұл сөзі арқылы халқыңа, аса берді күллі адамзатқа пайдаңды тигізетін адам бол дегенді меңзейді. Осы тұрғыда атаның ғана емес, адамзаттың баласы болуды «қазаққа қара сөзден дес бермеген» Абайдың өнегесінен іздегім келеді.

Заңғар жазушы Мұхтар Әуезовтың «АБАЙ ЖОЛЫ» роман-эпопеясын оқу арқылы біз Абайды жақыннан тани түсеміз. Себебі, жазушы Абай өмірін оның медреседен оралуынан бастап, ақтық сапарға аттанғанымен аяқтайды. Бұл аралықтағы өмір жолы Абайды «АТАНЫҢ ҰЛЫ ЕМЕС, ЕЛІНІҢ ҰЛЫ» екенін дәлелдеп берді. Әкесі Құнанбай баласын билікке тартып, болыс болуға тәрбиелесе де Абай әрдайым халық жағынан табылды.

Шыңыраудағы су болғанша, кәрі, жасқа түгел пайдасы тиетін жайдақ су болғанды артық көрген Абай секілді әр қазақ баласы АТАНЫҢ ЕМЕС, ЕЛІНІҢ ҰЛЫ БОЛУЫ КЕРЕК. Сонда ғана ұлт ісі өркендеп, дамудың даңғыл жолына түсеміз.