«Baquatty Audan» жобасы Ақмола облысының әлеуметтік саласын дамытуға жаңа мүмкіндіктер ашады

Астанада Ақмола облысы Целиноград ауданында іске асырылған «Baquatty Audan» пилоттық жобасының қорытындылары бойынша кеңес өтті. Жиналысқа Президенттің әлеуметтік мәселелер жөніндегі кеңесшісі Алексей Цой, «Esen Foundation» қорының қадағалау кеңесінің төрағасы Әсет Исекешев, «AÑSA Foundation» атқарушы директоры Мұрат Жуманбай, «AMANAT» партиясының хатшысы Шолпан Каринова, Мәжіліс депутаты Айна Мысырәлімова, сондай-ақ білім беру және денсаулық сақтау саласының сарапшылары мен басқа да қорлардың өкілдері қатысты.

«Baquatty Audan» бастамасы Ansa және Esen Foundation жеке қорларының консорциумы, «Amanat» партиясы және облыстық әкімдікпен бірлесіп жүзеге асырылады. Ол ауылдық жерлерде білім беру, денсаулық сақтау, инклюзия және еңбекке орналастыру жүйесін күшейтеді.

«Ауылдық педагогикалық академия 1000 мұғалімді біріктіріп, 300 сабақ өткізді, 500 пән мұғаліміне және 90 басшыға арналған оқыту ұйымдастырылды. Ақмол ауылында әдістемелер мен бағдарламаларды әзірлеуге арналған коворкинг ашылды», – деді Әсет Исекешев.

Аудан мектеп жанында ерекше білім беру қажеттіліктері бар балаларды қолдау жүйесін құрды. Медициналық мекемелерде жабдық жаңартылып, сандық диагностика мен телемедицина енгізілді, бұл бұзылыстарды ертерек анықтауға және консультацияға күту уақытын қысқартуға мүмкіндік береді. Үш бағыт – мектеп, инклюзия және медицина – синхронды жұмыс істеп, тұрақты даму моделін қалыптастырады.

«Бұл модельді ауқымдауды жоспарлап отырмыз, пилот тәжірибе облыстық орталыққа тарады: жоба стандарттары бойынша кабинет ашылды. Қор өкілдеріне қолдау көрсеткендері үшін алғыс айтамыз және әрі қарай ынтымақтастыққа дайынбыз», – деді облыс әкімінің орынбасары Алтынай Әміренова.