Ақмола облысында 18 жастан асқан психоневрологиялық аурулары бар қызмет алушыларға арналған кезек толық босатылды

Ақмола облысында 18 жастан асқан психоневрологиялық аурулары бар адамдарға арнайы әлеуметтік қызметтер көрсету бойынша кезек толықтай босатылды. Бұл Степногорск қаласына қарасты Шантөбе кентіндегі «Жақсы Жаңғыстау» арнайы әлеуметтік қызмет көрсету орталығының екінші корпусының ашылуының арқасында мүмкін болды. Аумағы 2 мың шаршы метрден асатын жаңа корпус 135 қызмет алушыға арналған.

Ғимаратта жөндеу жұмыстары жүргізілді. Бірқатар ауқымды жұмыстар атқарылды: аумаққа жаңа қоршау орнатылды, шатыр жөнделді, сыртқы және ішкі су жүйелері, жылыту және кәріз желілері толықтай ауыстырылды.

Орталықтың қызметі психоневрологиялық аурулары бар, 18 жастан асқан мүгедектігі бар адамдарға әлеуметтік қолдау көрсетуге бағытталған. Қызмет алушылар үшін барлық қажетті жағдай жасалған: спорт және акт залдары, еңбек терапиясы кабинеттері, асхана, жаңа жиһазбен және жабдықтармен қамтамасыз етілген медициналық кабинеттер жұмыс істейді. Өз кітапханасы бар, психоэмоционалдық жағдайды бағалау, еңбек терапиясы және емдік дене шынықтыру бойынша сабақтар өткізіледі.

Мекеме құжаттарды уақытылы рәсімдеуге және құқықтық процедуралардан өтуге жәрдемдеседі: жеке куәлікті ауыстыру, тұрғылықты жер бойынша тіркеу, әлеуметтік төлемдерді рәсімдеу, әрекетке қабілеттілік мәселелерін сотта қарау, жылжымайтын мүлікке құқықтарды сақтау және басқа да заңдық мәселелер. Сондай-ақ қызмет алушылардың мүліктік құқықтарын қорғау бойынша жұмыс жүргізіледі.

Орталық инфрақұрылымының кеңеюі әлеуметтік қызметтердің қолжетімділігін айтарлықтай арттырып, тұрақты қолдауды қажет ететін адамдар үшін жайлы жағдай жасауға мүмкіндік берді.