Марат Ахметжанов су тасқынынан зардап шеккен зеренділіктерге жаңа пәтерлердің кілттерін табыстады

Зеренді ауылында көктемгі су тасқынынан зардап шеккен сегіз отбасы жаңа қоныстарын атап өтуде. Ақмола облысының әкімі Марат Ахметжанов оларға заманауи бес қабатты үйдегі жайлы пәтерлердің кілттерін табыстады.

Биыл көктемде жауын-шашынның көп түсуі мен Зеренді көліндегі судың деңгейінің көтерілуі салдарынан жағалау маңындағы тұрғын үйлерді су басқан еді. Маусым айында ауданда төтенше жағдай режимі жарияланып, 17 үй апатты деп танылды.

Үш отбасына тұрғын үй жергілікті бюджет есебінен сатып алынуда, бір тұрғынға қайталама нарықтан пәтер берілді, ал сегіз отбасы Ильясов көшесі, 55 мекенжайындағы жаңа үйден баспана алды. Бес отбасы жеке себептермен көшуге бас тартқан.

Өңір басшысы жаңа қоныстанушыларға кілттерін табыстап, әр отбасыны жеке құттықтады.

«Бүгінгі күн – жаңа үміттің символы. Біз қиын көктемді өткердік, бірақ ешкім назардан тыс қалған жоқ. Мемлекет өз азаматтары алдындағы міндеттемелерін орындады. Енді әр отбасының баспанасы бар, жылуы бар, жайлылығы мен ертеңгі күнге сенімі бар», – деді Марат Ахметжанов.

Жаңа пәтер иегерлерінің бірі Любовь Криворучка өз әсерімен бөлісті:

«Сол күндерді еске алу қиын... Көп көз жасы төгілді, талай отбасы үйінен айырылды. Барлық жерді су басты. Бізге көмек көрсеткендердің бәріне алғыс айтамыз. Пәтерлерді өз тұрғын алаңымызға сәйкес өзіміз таңдадық. Өмірді жаңадан бастау – үлкен бақыт», – деді ол.

Облыс әкімі жаңа пәтерлерді аралап, екі баласы бар Кенжебаевтар отбасын құттықтап, оларға тұрмыстық техника алуға сертификат табыстады.

Жалпы ауданы 4 мың шаршы метрден асатын пәтерлер инженерлік желілерге толық қосылған және абаттандырылған ауламен қамтамасыз етілген.