Ақмола облысы Қытайдағы «Орталық Азия» Инвестициялық үйінде AQMOLA INVEST өкілдігін ашты

Қытайға ресми сапар аясында Ақмола облысының делегациясы Шанхай қаласындағы Ұлттық көрме орталығында өтіп жатқан Импорттың халықаралық көрмесіне (CIIE 2025) қатысты. Көрмеде Ақмола облысы өңірдің өнеркәсіп, ауыл шаруашылығы, энергетика және туризм салаларындағы әлеуетін таныстырды.

Ақмола облысының әкімі Марат Ахметжанов Қазақстанның ұлттық павильонына барып, онда «Гормолзавод» ЖШС мен «Көкшетау минералды сулары» АҚ өз өнімдерін ұсынды.

Форум барысында өңір делегациясы көлік және сауда интеграциясы саласындағы ынтымақтастық туралы келісімдерге, сондай-ақ Ақмола облысының «Қытай – Орталық Азия» форматындағы еркін сауда ынтымақтастық платформасына аккредитациясы және Цзянсу провинциясы Нанкин қаласындағы Инвестициялық үйде Ақмола облысының «Aqmola Invest» инвестицияларды дамыту орталығының өкілдігін ашу туралы стратегиялық шеңберлік келісімге қол қойды.

Қол қою рәсіміне Цзянсу провинциясының губернаторы Лю Сяотао және Нанкин қаласы партия комитетінің хатшысы қатысты.

Сонымен қатар, облыс делегациясы «Қытай — Орталық Азия» форматындағы еркін сауда ынтымақтастық платформасының таныстырылымы тақырыбындағы панельдік сессияға да қатысты.