Зеренді ауданында тұрғындар он жылдан астам күткен жолдың жөндеу жұмыстары аяқталды

Ақмола облысының Зеренді ауданында «Астана – Петропавл» трассасынан Гранитный кенті арқылы Васильковка ауылына дейінгі автокөлік жолының жөндеу жұмыстары аяқталды. Ұзындығы тоғыз шақырымды құрайтын бұл жол аудандық маңызы бар нысан болып табылады және өңірдің көлік желісінде маңызды рөл атқарады. Ол бірнеше елді мекенді байланыстырып, жергілікті карьерлерден жүк көліктерінің қатынауын қамтамасыз етеді, сондықтан аудан экономикасы үшін стратегиялық маңызға ие.

Жөндеу жұмыстары көлік инфрақұрылымын дамыту бағдарламасы аясында жүргізілді. 2024 жылы Зеренді ауданы әкімдігі жобалық-сметалық құжаттаманы әзірлеген болатын, ал өткізілген конкурс нәтижесінде мердігер ұйым болып «Көкшетау Жолдары» ЖШС анықталды. Жобаны жүзеге асыруға 2025 жылы бюджеттен қаражат бөлінді.

Жоба аясында ресайклинг әдісімен жолдың негізін нығайту, су өткізу құбырларын жөндеу және қалпына келтіру, жол жиегін бекіту, жол белгілерін орнату, сызық сызу және қалыңдығы алты сантиметр жаңа асфальт жабындысын төсеу көзделген.

Қонысбай ауылдық округінің әкімі Жасқайрат Еслямбековтың айтуынша, мердігер ұйым жұмысты сапалы әрі белгіленген мерзімде орындады.

«Бір ай шамасында мамандар барлық жоспарланған жұмыстарды аяқтады. Ұзындығы 4,1 шақырым учаскеде жаңа асфальт төселді, қазір жол жиегін абаттандыру жұмыстары аяқталуда. Гранитный кентінің тұрғындары бұл жөндеуді он жылдан астам уақыт күтті және бірнеше рет әкімдікке жүгінген болатын. Қазір халық риза – жол жайлы әрі қауіпсіз болды», – деді ол.

Бұрын бұл жол учаскесі ең проблемалы бағыттардың бірі саналды: ауыр жүк көліктерінің үздіксіз қозғалысы салдарынан жабынды жиі бұзылып, қолайсыздық пен қауіп төндірген еді. Жаңарту жұмыстарынан кейін елді мекендер арасындағы қозғалыс айтарлықтай жеңілдеп, жол сапасы қазіргі стандарттарға сай келтірілді.

Аудан әкімдігінде атап өткендей, «Гранитный – Васильковка» жолының жөндеуі – Зеренді ауданының жол желісін жаңғыртудың кешенді жоспарының бір бөлігі. Алдағы жылдары осындай жұмыстар басқа бағыттарда да жүргізілетін болады.