Астрахан ауданында дәрігерлік амбулатория ашылды

Астрахан ауданындағы Ескі Қалқұтан ауылында «Ауылдық денсаулық сақтауды жаңғырту» ұлттық жобасы аясында жаңа дәрігерлік амбулатория ашылды.

Амбулатория 1 000-нан астам ауыл тұрғынына қызмет көрсетуге арналған және шалғай елді мекен тұрғындарына медициналық көмектің қолжетімділігін қамтамасыз ететін алғашқы медициналық-санитарлық көмек көрсетудің маңызды нысанына айналады.

Нысанның ашылуымен Ақмола облысы әкімінің орынбасары Алтынай Әміренова танысты. Ол ауылдағы медициналық қызмет көрсету жағдайларын жақсарту – Мемлекет басшысының денсаулық сақтау саласындағы саясатын іске асырудың басым бағыттарының бірі екенін атап өтті.

Астрахан аудандық ауруханасының бас дәрігері Әсемгүл Қазизованың айтуынша, нысан толық қажетті жабдықтармен қамтамасыз етілген:

«Дәрігерлік амбулатория тұрғындарға дер кезінде әрі сапалы алғашқы медициналық көмек көрсетуге мүмкіндік береді. Медицина қызметкерлерінің жұмыс істеуі үшін барлық жағдай жасалған», — деді ол.

«Бұрын дәрігерлер бізді 60-жылдары салынған ескі әрі суық ғимаратта қабылдайтын. Енді бізде жаңа әрі заманауи құрал-жабдықтармен қамтамасыз етілген дәрігерлік амбулатория бар», — деп қуанышын ауыл тұрғыны Асылжан Мырзабай бөлісті.

Жаңа ғимаратта бір ауысымда 45 адам қабылдауға арналған. Онда процедуралық және егу кабинеттері, акушерка кабинеті, стерилизациялық, физиотерапия кабинеті, информатизация кабинеті, қақырық қабылдау бөлмесі және дәрігер қабылдау кабинеті қарастырылған.

Амбулаторияның ашылуы ауылдағы медициналық көмектің сапасын арттырып, санитарлық жағдайды және профилактикалық жұмыстың деңгейін жақсартуға мүмкіндік береді.