Көкшетаудың дамуы: аурухана, Спорт сарайы және жаңа инфрақұрылымдық нысандар құрылысы
Ақмола облысының әкімі Марат Ахметжанов Көкшетау қаласына жасаған жұмыс сапары барысында әлеуметтік инфрақұрылым мен қаланы абаттандыру саласындағы бірқатар ірі жобалардың жүзеге асырылуымен танысты.
Аймақтың ауқымды нысандарының бірі - 630 орындық көпсалалы аурухана құрылысы. Бүгінгі күні жер қазу жұмыстары аяқталып, қасбетті әрлеу, монолитті конструкциялар мен ғимарат қаңқасын тұрғызу жұмыстары жүргізілуде. Құрылысқа шамамен 1,5 мың маман тартылған, нысанның дайындық деңгейі 30 %-ға жуық.
«Аурухана тек біздің облыс тұрғындарына ғана емес, көршілес аймақтарға да қызмет көрсетеді. Мұнда ең заманауи медициналық құрал-жабдық орнатылады, әрі ол халықаралық стандарттарға сай алдыңғы қатарлы мекемелердің бірі болады», - деп атап өтті өңір басшысы.
Құрылысты 2027 жылы аяқтау жоспарлануда. Медициналық персоналдың саны шамамен 2 мың адамды құрайды.
Белсенді түрде 10 мың шаршы метр аумақта «Көкше Арена» Спорт сарайының құрылысы жүргізілуде. Жоба жетекшісі Руслан Токпанбаевтың айтуынша, құрылысқа 200-ден астам маман қатысуда. Қаржыландыру арнайы мемлекеттік қор есебінен қамтамасыз етілген.
«Қаржыландыру толық көлемде қамтамасыз етілген, жыл соңына дейін нысан пайдалануға беріледі. Спорт сарайы көпфункционалды болады: мұнда атыс, волейбол, бокс, футбол, баскетбол, теннис, күрес және жеңіл атлетика залдары орналастырылады. Сондай-ақ корттар мен жүгіру жолақтары қарастырылған», – деді Марат Ахметжанов.
Облыс әкімі ерекше назар аударған жобалардың бірі – «Көкшалғын». Ол Мәңгілік алау саябағын, Даңқ аллеясын, Тәуелсіздік алаңын және Сағдиев көшесін қайта құруды қамтиды. Жобаның мақсаты – табиғи аумақтарды біріктіру, қолайлы серуен аймақтарын жасау, экологиялық жағдай мен микроклиматты жақсарту, экологиялық білім беру және тәрбиелеу жүйесін дамыту.
Сапар барысында Марат Ахметжанов «Kokshetau Mall» сауда-ойын-сауық орталығының құрылысымен де танысты. Орталық директоры Рустам Аубакировтың айтуынша, мұнда жергілікті тауар өндірушілердің қатысуымен жылына 350 тоннаға дейін дайын азық-түлік өнімдерін шығару жоспарлануда. Жобаны жүзеге асыру 600-ден астам жаңа жұмыс орнын ашуға мүмкіндік береді.