Макинск жаңарып келеді: Бұланды ауданында теміржол вокзалы қайта жаңғыртылып жатыр

Ақмола облысы Бұланды ауданының Макинск қаласында теміржол вокзалының күрделі жөндеуі қарқынды жүргізілуде. Бұл жұмыс жолаушылар инфрақұрылымын жаңғыртуға арналған ауқымды республикалық бағдарлама аясында іске асырылып жатыр. Алдағы айларда вокзал ғимараты толығымен түрленіп, жаңа кейіпке енеді. Аймақ басшысы Марат Ахметжанов жұмыс сапары барысында құрылыс барысымен танысты.

Жалпы республика бойынша 125 вокзалға жөндеу жүргізу жоспарланған, соның ішіндегі 16 вокзал Ақмола облысында орналасқан. Бұл республика бойынша ең жоғары көрсеткіш саналады. Жұмысқа өңірде екі мердігер ұйым – «Жарқын Құрылыс» ЖШС мен «Integro Construction» ЖШС жұмылдырылған.

Облыстық жолаушылар көлігі және автомобиль жолдары басқармасының басшысы Владимир Кулаковтың айтуынша, жұмыстар бекітілген кестеге сай жүргізіліп, жыл соңына дейін толық аяқталады деп жоспарланып отыр.

«Вокзалдың жалпы ауданы 344,4 шаршы метрді құрайды. Қазіргі уақытта демонтаж жұмыстары аяқталып, ғимараттың қасбеті қапталуда, тірек құрылымдары нығайтылып, жаңа шатыр орнату басталды. Сонымен қатар вокзал алдындағы аумақты абаттандыруға арналған жобалық-сметалық құжаттама әзірленіп жатыр. Қаржыландыру мәселесі облыстық мәслихаттың алдағы сессиясында қаралады», – деді Кулаков.

Бұл вокзал ғимараты өткен ғасырдың 50–60-жылдары салынған еді. Соңғы күрделі жөндеу жұмыстары 20 жылдан астам уақыт бұрын жүргізілген. Макинск елорда мен облыс орталығының аралығында орналасқандықтан, вокзал үлкен жолаушылар легіне қызмет көрсетеді.

«Бұл ғимаратқа расында-ақ көптен бері жөндеу қажет еді. Әуелде тек үстірт жөндеумен шектеледі деп ойлағанбыз, бірақ бәрін түбегейлі жаңартып жатыр екен. Ескі ғимараттан түк қалмапты деуге болады. Уақтылы аяқталса екен дейміз. Бізде оқу үшін қатынайтын студенттер көп – енді жағдай анағұрлым ыңғайлы болады», – дейді Макинск тұрғыны Гүлмира Шарипова.

Сапар барысында облыс әкімі өңірдегі өзге де қалалар мен аудандарда – Көкшетау, Щучинск, Атбасар, Ақкөл, Есіл, Ерейментау, Державинск қалаларында, сондай-ақ Жақсы, Жалтыр, Аршалы, Шортанды, Никольское, Еркіншілік, Сарыоба мен Ұланты ауылдарында вокзалдарды күрделі жөндеу барысы туралы есептерді тыңдады.

Марат Ахметжанов мердігер ұйымдар мен тиісті басқармаларға жұмыстардың сапасы мен мерзімін қатаң бақылауда ұстауды тапсырды.

«Теміржол вокзалы – қаланың айнасы. Әр жолаушы үшін жайлылық, қауіпсіздік және заманауи инфрақұрылым қамтамасыз етілуі керек. Әсіресе Макинск секілді маңызды елді мекендерде. Барлық нысан сапалы әрі уақытылы аяқталуы тиіс», – деп атап өтті аймақ басшысы.