Брифинг

Бүгін Ақмола облысының денсаулық сақтау басқармасының басшысы Нариман Ермек брифинг өткізді. Өңірдің журналистерімен кездесу барысында ол «Ауылда денсаулық сақтауды жаңғырту» ұлттық жобасының жүзеге асырылу барысы туралы баяндады.

Бұл жоба аясында үш жылда еліміздің барлық өңірлерінде 655 денсаулық сақтау объектісі іске қосылып жатыр. Олар медициналық пунктер, дәрігерлік амбулаториялар, фельдшерлік-акушерлік пунктер. Енді Ақмола облысындағы шалғай ауылдардың тұрғындары, яғни 75 мыңнан астам адам, дәрігер қабылдауына жазылып, скринингтерден өтіп, кеңес ала алады және тағайындауларын алып, өз ауылдарынан шықпай-ақ медициналық көмек ала алады. Қазіргі таңда 32 бастапқы денсаулық сақтау объектісі салынды, 23 объектіге медициналық қызмет көрсетуге рұқсат беретін құжаттар берілді.

Ұлттық жоба сондай-ақ ауруханаларды күрделі жөндеу мен кадр мәселелерін шешуге бағытталған. Бұл шаралар ауруларды ерте анықтауға және ауылдық жерлерде сапалы медициналық қызметтің қолжетімділігін қамтамасыз етуге ықпал етеді.