Миллиардтық инвестиция және жаңа жұмыс орындары: Зеренді ауданында қандай ірі жобалар іске асып жатыр

Өңірде инвестициялық тартымдылықты арттыру және жаңа өндіріс орындарын ашу бағытында Зеренді ауданының әкімдігі жүйелі жұмыс жүргізіп келеді. Инфрақұрылымды дамытудың нәтижелері, өнеркәсіп пен ауыл шаруашылығындағы серпінді қадамдар және қолға алынған су жаңа жобалар туралы өткен брифингте Зеренді ауданының әкімі Әсет Құрманғожин мәлімдеді.

Бүгінгі таңда ауданда 10 ірі инвестициялық жоба жүзеге асырылуда. Мамандардың айтуынша, бұл жобалар өңір экономикасын жаңа деңгейге көтеріп қана қоймай, жергілікті тұрғындар үшін жүздеген тұрақты жұмыс орнын ашуға мүмкіндік береді. Осы орайда, «Qazaq Kaolin» зауытының құрылысы ерекше назарда – аталған бірегей кәсіпорынды іске қосу осы жылға жоспарланған және мұнда 130-дан астам адам жұмыспен қамтылады. Сондай-ақ, Қарағай станциясында аумағы 96 гектарды құрайтын индустриялық аймақтың бас жоспары бекітіліп, онда тәулігіне 500 тонна өнім өндіретін құрама жем зауыты сәтті іске қосылды. Кәсіпорын қазірдің өзінде өз өнімдерін Қытай Халық Республикасына экспорттауды бастап кетті.

Өңірде өнеркәсіптен бөлек, баламалы энергетика мен экологияны жақсартуға бағытталған жасыл жобалар белсенді жүзеге асырылуда. Энергетика бағытында әрқайсысы 100 МВт қуатқа ие «Alpha Wind» және «Гиперборея» жел электр станцияларының құрылысы жоспарланып, тиісті жер учаскелері бөлінді. Сонымен қатар, Серафимовка ауылының жанында «Эко-Dump» ЖШС-нің қалдықтарды өңдеу зауытының құрылысы басталды, бұл экологиялық ахуалды жақсартуға үлкен сепін бермек. Бұған қоса, мал шаруашылығында «Агро Милк Проджект» серіктестігі 400 басқа арналған сүт-тауарлы фермасын іске қосса, алдағы уақытта «Дихан Плюс» компаниясы тарапынан 4 000 басқа арналған ірі фермалар кешені бой көтереді.

«Біздің басты мақсатымыз — жай ғана көрсеткіштер қуу емес, аудан нарығының ашықтығы мен тұрақтылығын қамтамасыз ету және әрбір инвестор мен кәсіпкер үшін қолайлы экожүйе құру. Жаңа өндіріс орындары мен заманауи кешендердің ашылуы — ауылдық жерлердегі азаматтарымыздың өмір сүру сапасын арттырудың және өңірдегі жұмыссыздық мәселесін шешудің ең маңызды шарты болып табылады», — деп атап өтті аудан әкімі Әсет Құрманғожин.

Әкімдік инвесторлар мен бизнес өкілдерін жоғары әлеуметтік жауапкершілік танытуға және аудан игілігі үшін бірлесе жұмыс істеуге шақырады. Өңірдегі ашық ережелер мен жасалып жатқан мемлекеттік қолдау шаралары жаңа жобалардың сәтті жүзеге асуына кепілдік бере отырып, Зеренді ауданының ұзақ мерзімді тұрақты дамуын нығайтуға ықпал етеді.