Бұланды ауданында апатты тұрғын үй мәселесін шешу қарқыны артты

Соңғы үш жылдың қорытындысы бойынша Бұланды ауданында тұрғын үй құрылысының қарқыны рекордтық деңгейге жетіп, алдыңғы төрт жылдағы көрсеткіштермен пара-пар нәтижеге қол жеткізілді. Апатты тұрғын үй қорын жаңарту бағдарламасының жүзеге асырылуы және су тасқынынан зардап шеккен отбасыларды баспанамен қамтамасыз ету жұмыстары туралы аудан әкімі Ардақ Смайылов баяндады.

Тұрғын үйлердің басым бөлігі өткен жылы пайдалануға берілді. Құрылыс саласының әлеуметтік бағыттылығы көктемгі су тасқыны салдарынан баспанасынан айырылған азаматтарға арналған үйлердің салынуымен және ескі, тозығы жеткен ғимараттарды кезең-кезеңімен бұзу жұмыстарымен қамтамасыз етілді. Мемлекеттік сектордан бөлек, жергілікті кәсіпкерлер де белсенділік танытуда. Аудан орталығында жеке кәсіпкердің қаражаты есебінен салынған және кейін нарықта сатуға арналған жайлылығы жоғары бес қабатты тұрғын үйдің құрылысы аяқталды.

«Тұрғын үй қорын жаңарту бағдарламасы аясында Макинск қаласында көппәтерлі тұрғын үй пайдалануға берілді. Ондағы пәтерлердің басым бөлігі тұруға қауіпті деп танылған үйлердің бұрынғы иелеріне табысталды. Біздің басты мақсатымыз – халықтың әлеуметтік осал санаттарын сапалы баспанамен толық қамтамасыз ету», – деді Ардақ Смайылов.

Биыл да ауданның құрылыс саласы жоғары қарқынын сақтап отыр. Жергілікті атқарушы билік үшін басым бағыттардың бірі – кешенді тәсілді жүзеге асыру. Бұл ретте жаңа тұрғын үй нысандарының құрылысы инженерлік-коммуникациялық инфрақұрылымды тарту және оған іргелес аумақтарды абаттандыру жұмыстарымен қатар жүргізілуде.