Қазақстанда мемлекеттік қызметті жаңғырту туралы заңға қол қойылды
Мемлекет басшысы «Қазақстан Республикасының мемлекеттік қызметі туралы» жаңартылған заңға және оған ілеспе заңнамалық түзетулерге қол қойды. Өзгерістер топтамасы мемлекеттік аппаратты ауқымды цифрлық трансформациялауға, клиентке бағдарланған жүйеге көшуге және жас таланттарды тартуға бағытталған. Бұл туралы Өңірлік коммуникациялар қызметінің брифингінде Мемлекеттік қызмет істері агенттігінің облыстық департаментінің басшысы Нуркат Батыркулов айтып берді.
Реформаның басты бағыты – мемлекеттік қызметшілер жұмысына сервистік тәсілді заңнамалық тұрғыда бекіту болмақ. Заңда мемлекеттік қызметтердің қолжетімділігі мен сапасына бағдарланған мінез-құлық моделі нақты айқындалған, сондай-ақ басқарушылардың адалдығының негізгі өлшеміне айналатын мінсіз бедел институты енгізіледі. Бұдан бөлек, нормативтік база елдің жаңартылған Конституциясына толық сәйкестендірілді.
Түзетулер мемлекеттік функцияларды орындауға жәрдемдесетін тұлғалардың, оның ішінде келісімшарт негізінде және шетелдік қызметкерлердің, сондай-ақ техникалық персоналдың құқықтық мәртебесіне де қатысты болды. Енді олар үшін қызметтік әдеп, жауапкершілік және мүдделер қақтығысының алдын алу мәселелері қатаң реттеледі.
«Өңірлерге жас әрі талантты кадрларды тарту үшін мемлекеттік қызметке даярлаудың толыққанды институты енгізілуде. Бұл – мемлекеттік міндеттерді тиімді орындауға қажетті құзыреттерді алдын ала қалыптастыруға бағытталған білім беру және практикалық іс-шаралардың кешені», – деді Нуркат Батыркулов.
Ашықтықты қамтамасыз етудегі маңызды қадамдардың бірі – іріктеу рәсімдерін «E-қызмет» интеграцияланған ақпараттық жүйесі платформасына көшіру болмақ. Жүйе қолданыстағы мемлекеттік қызметшілерді де, мемлекеттік заңды тұлғалардағы басшылық лауазымдарға үміткерлерді де қамтиды. «Б» корпусы ішіндегі мансаптық өсу бір лауазым шеңберіндегі көлденең даму тетігі арқылы икемдірек бола түседі: енді қызметкерлердің жалақысы берілген лауазымдық деңгейге тікелей тәуелді болады.
Сонымен қатар жауапкершілік институты да реформалануда. Тәртіптік жазалардың мерзімдері енді құқық бұзушылықтың ауырлығына қарай сараланады. Ал құқық бұзушылықтардың алдын алу үшін профилактикалық әңгімелесулер мен құзыреттерді жоспардан тыс тексеру секілді превентивтік құқықтық ықпал ету шаралары енгізіледі.