Есіл ауданында көкөніс дақылдарын егу жұмыстары қалай жүріп жатыр

Есіл ауданында «Органико» ЖШС көкөніс дақылдарын отырғызу бойынша көктемгі дала жұмыстарын белсенді түрде жүргізуде. Кәсіпорынның жалпы жер алқабы 120 гектарды құрайды. Биыл аграршылар өндірістік процестерді жаңғыртуға және өңір нарығында сұранысқа ие жергілікті өнім түрлерін көбейтуге басымдық беріп отыр.

Қазіргі таңда шаруашылықта 22 гектар жерге картоп егілді. Кәсіпорын жоспарына сәйкес, бұл дақылдың егіс көлемі 50 гектарға дейін жеткізіледі. Одан кейін жұмысшылар 10 гектар аумаққа сәбіз егуге кіріседі. Биыл «Органико» ЖШС алғаш рет бірден екі түрлі картоп сұрпын өсіруді жоспарлап отыр. Бұл тұтынушыларға ұсынылатын өнім түрлерін кеңейтуге мүмкіндік береді.

Егіс науқанын табысты жүргізуге өндірістік процестерді оңтайландыру ықпал етуде. Қол еңбегін автоматтандыру және тиімсіз операцияларды алып тастау арқылы алқапта жұмыс істейтін қызметкерлер саны он адамнан үш адамға дейін қысқарған.

Қазір егіс пен өсімдіктерді күтіп-баптаудың барлық негізгі кезеңдері толық автоматтандырылған. Қуаңшылықтан қорғау үшін шаруашылық алқаптарына заманауи суару жүйелері енгізілуде: картоп алқаптарына барабанды суару машиналары қызмет көрсетсе, сәбіз егілген жерлерде тамшылатып суару технологиясы қолданылады.

«Біздің өнімдеріміз әрдайым жоғары дәмдік сапасымен ерекшеленеді. Кадр мәселесінде де жоғары тиімділікке қол жеткізіп отырмыз: бастапқыда алқапта он адам жұмыс істесе, бүгінде процестерді толық оңтайландыру мен автоматтандырудың арқасында бұл жұмысты үш адам атқарып жүр. Біз барлық артық қимылдарды алып тастап, технологияны толық автоматтандырдық», – деді «Органико» ЖШС директорының орынбасары Виталий Кореньков.

Ашық топырақтағы өндірісті дамыту және ылғал үнемдеу технологияларын қолдану кәсіпорынға қуаң климат жағдайында да тұрақты түрде мол өнім алуға мүмкіндік беріп отыр. Бұл облыс дүкендеріне сапалы отандық көкөністердің үздіксіз жеткізілуін қамтамасыз етеді.