Көкшетауда халықаралық деңгейдегі инклюзивті спорт кешені бой көтеруде
Көкшетауда паралимпиадашыларға арналған мамандандырылған залдары мен аутизмі бар балаларға арналған жеке блогы бар бірегей Инклюзивті спорт орталығы салынады. Ауданы 3 600 шаршы метрді құрайтын нысан «Сарыарқа» шағын ауданында бой көтеріп, осы жылдың желтоқсан айында пайдалануға беріледі.
Жаңа кешен 14 мыңнан астам ерекше қажеттіліктері бар балалар тұратын Ақмола облысының тұрғындарын оңалтудың негізгі алаңына айналады. Бір жарым гектар аумақта төрт бағыт бойынша инфрақұрылым құрылады: спорт, білім беру, профилактика және шығармашылық. Орталық бір ауысымда 300 адамды қабылдауға есептелген және барлық жастағы адамдар үшін қолжетімді болады.
«Біз орталықты Еуропадан әкелінген мамандандырылған медициналық жабдықтармен жабдықтаймыз. Әмбебап залда еденді жылыту жүйесі орнатылады, бұл — отырып ойнайтын спорт түрлеріне қойылатын техникалық талап. Негізінде, нысан толыққанды емдеу-профилактикалық кешеніне айналады», - деп атап өтті «BI GROUP» құрылыс компаниясының өкілі Ерлан Бегалин.
Айта кету керек, жобаның тұжырымдамасы сарапшылармен бірлесіп жарты жыл бойы әзірленген. Басты міндет — функционалдығы жағынан елордалық баламалардан асып түсетін жоба жасау болды.
«Елордадағы ұқсас жобадан айырмашылығы, біз мұнда аутизмі бар балаларға арналған блокты қосымша біріктірдік. Сапалы инфрақұрылым өңірлерде де елорда деңгейінде қолжетімді болуы тиіс. Бұл кешен Көкшетауда мүмкіндігі шектеулі атлеттер үшін халықаралық деңгейдегі жарыстарды өткізуге мүмкіндік береді», - деді Ақмола облысының әкімі Марат Ахметжанов.
Ата-аналар қауымдастығы үшін бұл жоба мамандандырылған алаңдардың тапшылығы мәселесін шешуге септігін тигізбек. Қоғам қайраткері Махаббат Қасымова орталықта аутизм және БЦП (балалардың сал ауруы) диагнозы бар балалар үшін ABA-терапия және сенсорлық интеграция әдістерін енгізудің маңыздылығын атап өтті.
«Ата-аналар бұл бастаманың жүзеге асуын асыға күтті. Біз қазірдің өзінде орталықта жұмыс істейтін білікті мамандарды даярлау мәселесін талқылап жатырмыз. Облыс үшін бұл әлеуметтік қолдаудың түбегейлі жаңа деңгейі», - деді Махаббат Қасымова.
Құрылыс басында 400-ге жуық адам жұмыс істеуде. Нысанды тапсыру желтоқсан айына жоспарланған. Кешеннің «Viamedis» клиникасымен көршілес орналасуы облыс орталығында бірыңғай заманауи медициналық кластер құруға мүмкіндік береді.