Ақмола облысындағы ауылдарда газдандыру жұмыстары қарқынды жүріп жатыр

Ақмола облысында халықты табиғи газбен қамту жұмыстары үш жыл бұрын басталған еді. Қазіргі уақытта бұл міндетті «QAZAQGAZ AIMAQ» акционерлік қоғамының Астана өндірістік филиалы жүзеге асырып келеді.

Бүгінде облыстағы 19 ауылдың 50 мыңнан астам тұрғыны орталықтандырылған газ жүйесіне қосылу мүмкіндігіне ие. Целиноград ауданында екі елді мекен «көгілдір отынға» қосылған. Аймақтағы газдандыру деңгейі қазір 12 пайызды құрайды.

Облыстық энергетика және ТКШ басқармасы басшысының орынбасары Асетхан Атыбековтың айтуынша, сенімді басқаруға 722 шақырым газ құбыры желілері және 132 газ реттеу бекеті берілген. Биылдың өзінде ғана Шұбар және Нұрлы ауылдарының 4 мыңнан астам тұрғыны газға қол жеткізді. Қазіргі уақытта тағы 11 елді мекенде жұмыстар жүргізілуде.

Келесі жылы Софиевка, Қызылжар, Ақмол, Қабанбай батыр, Қажымұқан, Рахымжан Қошқарбаев және Өтеміс ауылдарын газдандыру жобалары әзірленбек. Ал биылғы жылдың соңына дейін Қызылсуат, Аққайың, Алтынсарин, Қоянды, Талапкер ауылдары мен Қосшы қаласының тұрғындары орталықтандырылған газға қосылмақ.

Қосшы қаласында газ құбырын тарту жұмыстары 2024 жылдың 10 мамырында басталған. Бүгінгі күнге дейін орташа қысымды құбырдың 38 шақырымынан 36 шақырымы, ал төмен қысымды құбырдың 367 шақырымынан 151 шақырымы салынды. Жобада 30 техника мен 120-ға жуық жұмысшы еңбек етуде.

Астаналық филиалдың бөлім басшысы Нұрболат Мерғалиевтің айтуынша, алғашқы болып газға қосылған елді мекен – Нұрлы ауылы. Бұл жобаға 1,4 млрд теңге инвестиция құйылып, 72 шақырымнан астам газ құбыры мен 7 реттеу бекеті салынған. 1040 абонент алғаш рет табиғи газға қол жеткізді. Ал биыл 28 мамырда Шұбар ауылында 400 абонент газға қосылды.

Жергілікті тұрғындардың айтуынша, газға қосылғаннан бері үйді жылыту мен ас дайындау айтарлықтай жеңілдеген, шығын да азайған.
Жалпы жоспар бойынша, жыл соңына дейін алты елді мекеннің, соның ішінде Қосшы қаласының бір бөлігінің тұрғындары көгілдір отынға қол жеткізеді. Ал 2026 жылдың соңына қарай тағы алты ауылды газдандыру көзделген. Жоба толық іске асқанда 40 мыңнан астам абонент табиғи газды пайдалана алады.