Өсім, жоспар және өзгеріс: Шортанды ауданы қалай дамып жатыр
Шортанды ауданы барлық негізгі бағыттар бойынша тұрақты дамудың оң қарқынын көрсетіп келеді. Биылғы жылдың алғашқы бес айының қорытындысы бойынша мұнда инвестиция көлемі артып, ауыл шаруашылығы өндірісі кеңеюде, тұрғын үй құрылысы жүргізілуде, жаңа әлеуметтік бастамалар іске асырылып, инфрақұрылым жүйелі түрде жаңартылуда.
Аудан әкімі Сағындық Шабаровтың айтуынша, жарты жылда өңір экономикасына 6,4 миллиард теңгеден астам инвестиция тартылған, бұл өткен жылдың сәйкес кезеңімен салыстырғанда екі есе көп. Қаражаттың басым бөлігі – жергілікті кәсіпорындардың өз қаржысы. Ауданда жалпы құны 20 миллиард теңгеден асатын 19 жоба жүзеге асырылып жатыр, олардың нәтижесінде 300-ге жуық жаңа жұмыс орны ашылады деп жоспарланған.
Ірі жобалар қатарында – «Қазақстан Орманы» орман питомнигі, «Бозайгыр» ЖШС-ның кірпіш зауыты және «Pepper Prod» ЖШС-ның сабаннан целлюлоза өнімін өндіру жобасы бар. Сонымен қатар, өндірістік қуаттарды жаңғырту ауқымды түрде жүргізіліп, өңдеу секторы кеңейіп келеді. Мал шаруашылығында «Ақ Лилия» кәсіпорны қайта қалпына келтірілуде, ал «Нұр Астық» ЖШС-ы сүт фермасының құрылысын бастаған.
«Бүгінде біздің алдымызда агроөнеркәсіптік кешендегі еңбек өнімділігін кемінде 2,5 есеге арттыру міндеті тұр. Бұл – ауыл тұрғындарының тұрақты және жыл бойғы жұмыспен қамтылуының негізгі кепілі», – деді аудан әкімі.
Ауыл шаруашылығында 248 мың гектар жерге егін себілді, оның ішінде майлы дақылдардың егіс көлемі ұлғайтылған. Бөлшек сауда айналымы 3 миллиард теңгеге, көтерме сауда көлемі 7 миллиард теңгеге жетіп, өткен жылғы көрсеткіштен он есе асып түсті. Алтын мен күміс өндірудің уақытша тоқтауына қарамастан, аудан өндіріс көлемі бойынша облыс бойынша үздік бестікте қалуда.
«Бастысы – біз орташа жалақы бойынша көшбасшылықты сақтап отырмыз: 399 615 теңге. Бұл – тірек кәсіпорындардың тұрақты жұмысы мен даму бағытының нақты көрсеткіші», – деді Сағындық Шабаров.
Тұрғын үй құрылысы да қарқын алуда. 2025 жылдың өзінде 5,6 мың шаршы метрден астам тұрғын үй пайдалануға берілді. Қазан айында әлеуметтік осал топтарға арналған 36 пәтерлі үйдің тапсырылады деп күтілуде. Ауызсу және жылумен қамту бағдарламалары белсенді іске асуда – бүгінде халықтың 97%-ы сапалы ауызсумен қамтамасыз етілген. Ключи және Бозайгыр ауылдарындағы желілер жаңғыртылып, аудан орталығының су жүйесі толықтай жөнделді.
Жолдарды жаңарту жұмыстары жалғасуда: соңғы үш жылда 60 шақырымға жуық жол жөнделді. Жаңа бағдаршамдар, жарық шамдары мен тротуарлар орнатылып жатыр. Қоғамдық көлік барлық елді мекенді қамтиды. Ал «Ауыл аманаты» бағдарламасы аясында шағын кәсіп иелеріне 49 миллион теңгеден астам жеңілдетілген несие берілді.
Әлеуметтік сала да назардан тыс қалмай отыр. 3 мыңнан астам адам 70 миллион теңгеден астам сомаға әлеуметтік көмек алды. Зейнеткерлерге санаторлық ем алу үшін өтемақы төлеу басталды, мектептер жөнделіп, денсаулық сақтау нысандары бой көтеруде. Бес айда 122 сәби дүниеге келген – бұл да ауданның тіршілігі мен әлеуетінің айғағы.
«Біз өзіміздегі проблемалық мәселелерді жақсы білеміз және оларды кезең-кезеңімен шешудеміз. Бірақ шортандылықтардың белсенді қатысуынсыз тұрақтылық пен өмір сапасына қол жеткізу мүмкін емес. Бүгінгі жетістіктеріміз – әр тұрғынның үлесі», – деп түйіндеді Сағындық Шабаров.
Шортанды ауданы тек тұрақты дамуды сақтап отырған жоқ, сонымен қатар инфрақұрылым, жұмыспен қамту және халықтың жайлы өмір сүруіне басымдық беретін жаңа даму моделін қалыптастыруда.