Ақмола облысының сайын даласында «Халық таңдаған үздік малшыны» анықтауға арналған медиа-марш басталды

Ақмола облысы, Қазақстан — «Jańa Dala / Green Day ‘2026» мерейтойлық X мамандандырылған «Қазақстандық Дала күні» көрме-көрсетілімінің ұйымдастырушылары жаңа бірегей медиа-жобаның басталғанын жариялады. Жұмысшы мамандықтары жылының жалғасы аясында ұйымдастырушылар тобы Ақмола облысының өңірлеріне арнайы экспедицияға аттанды. Экспедицияның басты мақсаты – еліміздің мал шаруашылығы саласында еңбек етіп жүрген қойшылар, малшылар мен жылқышылардың өмірі мен еңбегін көпшілікке таныстыру, сондай-ақ олармен эксклюзивті шағын сұхбаттар топтамасын әзірлеу.

Қазақстандағы малшы – ауыл шаруашылығының негізгі тіректерінің бірі болғанымен, еңбегі көп жағдайда тасада қалып қоятын мамандық иесі. Бүгінде еліміздегі ірі қара малдың (ІҚМ) жалпы санының 45 пайыздан астамы жеке қосалқы шаруашылықтарда өсіріледі. Жүздеген мың ауыл отбасының әл-ауқаты мен тұрмыс деңгейі, сондай-ақ өңірлердің азық-түлік қауіпсіздігі осы дала еңбеккерлерінің тынымсыз, тәулік бойғы адал еңбегіне тікелей байланысты.

Алғашқы нәтижелер және экспедиция бағыты

Жоба тобы небәрі екі күннің ішінде (25–26 маусым) жедел экспедиция ұйымдастырып, Ақмола облысының алты негізгі ауданын аралап үлгерді:

Атбасар ауданы
Бұланды ауданы
Бурабай ауданы
Есіл ауданы
Жақсы ауданы
Зеренді ауданы

Жобаның негізгі бағыттары

Шынайы өмірден алынған оқиғалар. Бейнесұхбаттар топтамасында қазіргі малшылардың күнделікті тұрмыс-тіршілігі, дала дәстүрлері, төзімділігі мен ұрпақтар сабақтастығы кеңінен таныстырылады.
Халықтық дауыс беру. Барлық бейнероликтер әлеуметтік желілерде жарияланады. Көрермендердің дауыс беру қорытындысы бойынша «Халық таңдаған үздік малшы» номинациясының жеңімпазы анықталады.
Бағалы сыйлық. Жеңімпазға «Jańa Dala / Green Day ’2026» көрмесінің ұйымдастырушылары атынан бағалы естелік сыйлық табысталады.

Еліміздің басты аграрлық алаңындағы салтанатты қорытынды

Жобаның шарықтау шегі мен жеңімпазды салтанатты марапаттау рәсімі 2026 жылғы 16–17 шілде күндері мерейтойлық «Jańa Dala / Green Day ’2026» көрме-көрсетілімі аясында өтеді. Іс-шара «Ақтық» агрофирмасы» АҚ-ның демонстрациялық алқаптарында (Ақмола облысы, Целиноград ауданы, Нұресіл ауылы) ұйымдастырылады.

Мыңдаған делегаттардың, фермерлердің, агроөнеркәсіп саласының мамандары мен халықаралық сарапшылардың алдында өңірдің үздік малшысы көрменің басты сахнасына көтеріліп, лайықты марапатқа ие болады.

Бұл марапат – адал еңбек адамдарына көрсетілген зор құрметтің белгісі ғана емес, сонымен қатар қазақ даласының ғасырлар бойы қалыптасқан мал шаруашылығы дәстүрлері мен болашақтың озық агротехнологияларын сабақтастыратын маңызды символ болмақ.