Ақмола облысы 2025 жылы елдің жетекші аграрлық өңірі мәртебесін растады

2025 жылдың қорытындысы бойынша Ақмола облысы Қазақстанның басты астықты өңірі ретіндегі мәртебесін тағы да нығайтты. Өңір диқандары дәнді дақылдардан рекордтық өнім жинап, оның көлемі 7,6 млн тоннадан асты. Сонымен қатар, астықтың 75 пайызы 3-сыныпты сапаға сәйкес келеді, бұл өнімнің жоғары сапасын айғақтайды.

Майлы дақылдар өндірісі де айтарлықтай өсім көрсетті. Олардың егіс алқабы 2,5 есеге ұлғайып, нәтижесінде шамамен 600 мың тонна өнім жиналды және ауыл шаруашылығы өндірісінің рентабельділігі артты. Жыл қорытындысы бойынша облыста ауыл шаруашылығы өнімдерінің жалпы шығарылымы 1,19 трлн теңгеге жетті. Сондай-ақ өңір ел бойынша ең жоғары физикалық көлем индексін (ИФО) көрсетті – 115,9%.

Ақмола облысы «Кең Дала» бағдарламасы аясында тартылған жеңілдетілген несиелік ресурстар көлемі бойынша республика өңірлері арасында көшбасшы атанды. 928 ауыл шаруашылығы тауарын өндіруші жалпы сомасы 118,7 млрд теңге көлемінде қаржыландыру алды, бұл егіс және орақ науқандарына уақтылы әрі сапалы дайындықты қамтамасыз етті. Өңір тарихында алғаш рет несиелік қаражаттың қайтарымдылығының жоғары деңгейі тіркелді.

Жыл басынан бері жақын және алыс шетелдерге 3,5 млн тоннадан астам жоғары сапалы астық экспортталды. Бұл өңірдің экспорттық әлеуетін арттырып, Қазақстанның әлемдік нарықтағы позициясын нығайта түсуде.

Сонымен қатар облыста мал шаруашылығын дамыту стратегиясы белсенді түрде жүзеге асырылуда. Негізгі бағыттардың бірі – Ерейментау ауданында мал шаруашылығы кластерін қалыптастыру. Жоба аясында бастапқы қуаттылығы 7,5 мың бас қалмақ тұқымды ірі қара малға арналған екі репродуктор, сондай-ақ 30 мың басқа арналған бордақылау алаңы салу көзделген. Бұл ет бағытындағы мал шаруашылығын дамытуға және азық-түлік қауіпсіздігін қамтамасыз етуге маңызды қадам болмақ.