Қазақстан мен Қытай: Ақмола облысында жаңа алтын байыту фабрикасын салу туралы келісімге қол қойылды

2025 жылғы 5–8 қараша аралығында Ақмола облысының әкімі Марат Ахметжанов бастаған делегация Қытай Халық Республикасына жұмыс сапарымен барды. Сапар барысында делегация әлемдегі үшінші ірі тау-кен өндіруші корпорация – Zijin Mining Group Co., Ltd. (Zijin Mining) компаниясының Сямынь қаласындағы қызметімен танысты.

Сондай-ақ делегация Шанхан уезінде орналасқан мыс балқыту зауыты мен «Цзыцзиньшань» алтын-мысты кен орнында болып, компанияның экологиялық тәжірибелерін көрді. Қолданылып жатқан технологиялар шығарындылар мен қалдықтарды барынша азайтуға бағытталған, бұл өз кезегінде БҰҰ талаптарын қоса алғанда, халықаралық экологиялық стандарттардың сақталуына мүмкіндік береді.

Компания жерді рекультивациялау саласында да инновациялық тәсілдерді қолданады: тау баурайларын тегістеу, топырақты қалпына келтіру және жаңа ормандар мен саябақтар жасау арқылы экожүйелерді қайта қалпына келтіруге және қоршаған ортаның сапасын жақсартуға ықпал етуде. Бұл шаралар ЮНЕСКО қолдайтын экологиялық тұрақтылық қағидаттарына сәйкес жүзеге асырылуда.

Сапар қорытындысы бойынша Ақмола облысы әкімдігі мен Zijin Mining Group арасында Бурабай ауданындағы Райгородок кен орнында алтын байыту фабрикасын салуға арналған Негіздемелік келісімге қол қойылды. Жобаның күтілетін инвестиция көлемі шамамен 500 миллион АҚШ долларын құрайды, сондай-ақ 1000-ға дейін жаңа жұмыс орны ашылады.

Компания халықаралық экологиялық стандарттарды сақтай отырып, өңірдің инфрақұрылымын жақсартуға және әлеуметтік жобаларды іске асыруға міндеттеме алды. Бұл бастама жергілікті экономиканың тұрақты дамуына да серпін бермек.