Целиноград ауданы инженерлік желілерді ауқымды жаңғыртып жатыр
Ақмола облысындағы ең қарқынды дамып келе жатқан өңірлердің бірі болып саналатын аудан жыл сайын күрделі сынмен бетпе-бет келеді – халық санының жедел өсуі тұрғын үй-коммуналдық шаруашылықтың тиісінше және озық дамуын талап етеді. Бұл стратегиялық міндеттерді өңірдің қалай шешіп жатқаны туралы Целиноград ауданының әкімі Дарын Сабырғали РСК брифингінде жасаған баяндамасында жан-жақты айтып берді.
Халықты сапалы ауыз сумен қамтамасыз ету жергілікті биліктің басты басымдықтарының бірі болып қала береді. Аудан бұл мәселені жүйелі түрде шешіп, су құбыр желілерін ауқымды түрде салуды қолға алған. Аққайың, Нұресіл, Қараменді батыр, Родина және Тонкеріс ауылдарының тұрғындары бұл жұмыстардың нәтижесін көріп үлгерді – онда жаңа су жүйелері толық іске қосылған. Қазіргі уақытта құрылыс техникасы Қараөткел, Қызылсуат және Софиевка ауылдарының көшелерінде жұмыс істеуде. Сонымен қатар коммуналдық сала болашақты да ойластыруда: Коянды, Тастақ, Ақжар ауылдарында су жүйелерін жаңғыртуға арналған жобалық-сметалық құжаттама әзірленіп жатыр. Сондай-ақ Кенжебай кен орнынан Талапкер мен Қажымұқан ірі елді мекендеріне дейінгі топтық су құбырының екінші кезеңін салу жоспарлануда.
Сонымен қатар ауданда электрмен жабдықтау жүйесі де дамуда. Қараөткел ауылында электр желілерінің екінші кезеңі аяқталды, Қояндыда жаңа комплектілі трансформаторлық қосалқы станциялар қосылуда, ал келесі жылы Қажымұқан ауылында да ауқымды кезең жоспарланған. Жүйенің тұрақты жұмыс істеуі үшін кейбір нысандар сенімгерлік басқаруға берілуде – Рахымжан Қошқарбаев және Софиевка ауылдарындағы ірі нысандар «АРЭК» АҚ-на тапсырылған.
«Аудан халқының қарқынды өсуі жағдайында инженерлік және көлік инфрақұрылымын одан әрі дамыту қажеттілігі сақталуда. Кейбір елді мекендерде жол салу және жөндеу, сапалы су, электр және газбен қамтамасыз ету мәселелері өзекті болып отыр», – деді Дарын Сабырғали өз баяндамасында.
Өңірдегі өмір сапасын арттырудың басты драйверлерінің бірі – газдандыру. Бұл қала мен ауыл арасындағы айырмашылықты азайтып, тұрғындарды көмір мен отын дайындау қажеттілігінен арылтып отыр. Есептік кезеңдегі маңызды жетістік – Нұрлы, Аққайың, Шұбар, Алтынсарин, Талапкер, Қоянды және Қараөткел ауылдарында бірден жеті газ нысанының іске қосылуы болды.
Газдандыру жұмыстары мұнымен тоқтамайды: Қаражар, Ақмола және Қараөткелдегі іске қосу кешендерінде жоспарлы жұмыстар жалғасуда. Сондай-ақ жыл соңына дейін Кабанбай батыр, Нұресіл және Арайлы ауылдарын қоса алғанда тағы алты елді мекенді газдандыру жобаларының құжаттамасы дайындалады.
Орталық жылу жүйесі сақталған елді мекендерде қыс маусымына дайындық аясында тозған құбырлар мен қазандық жабдықтары толық жаңартылды.
Көлік-логистика саласы да айтарлықтай дамып келеді. 19 жол инфрақұрылымы нысанында ауқымды құрылыс жұмыстары жүргізілді. Нәтижесінде 14 ауылда шамамен 81 шақырым жолға асфальт төселді. Биыл да қарқын төмендемейді: мердігерлер мен инвесторлар есебінен тағы 75 шақырымнан астам жол салу жоспарланған, сондай-ақ Есіл өзені арқылы өтетін жаңа көпірдің жобасын дайындау басталады.
Сонымен қатар көше жарықтандыру жүйелері жаңартылуда. 12 елді мекенде 5 мыңнан астам заманауи шам орнатылды. Бұл тек эстетика емес, сонымен қатар қауіпсіздік кепілі. Сондай-ақ 5 мыңға жуық жол белгілері мен элементтері орнатылды. 15 ауылда жаңа балалар және спорт алаңдары, демалыс аймақтары мен бейнебақылау жүйелері пайда болды.
Сөзінің соңында аудан басшысы жергілікті атқарушы биліктің басты міндетін атап өтті:
«Бүгінгі таңда ауданның басты міндеті – тек статистикалық көрсеткіштердің оң динамикасын сақтау ғана емес, әрбір тұрғын осы жұмыстың нәтижесін сапалы жолдар, тұрақты су мен электрмен жабдықтау, қолжетімді тұрғын үй, жаңа жұмыс орындары және жайлы өмір сүру ортасы арқылы сезінуін қамтамасыз ету».