Инвестициялар өсімі мен жол инфрақұрылымын дамыту әкімдік отырысында қаралды
Ақмола облысы әкімдігінің отырысында инвестициялар тарту және қысқы кезеңде автомобиль жолдарын күтіп-ұстау мәселелері қаралды.
Ақмола облысының кәсіпкерлік және өнеркәсіп басқармасының басшысы Бақытжан Сапардың айтуынша, 11 айдың қорытындысы бойынша өңір инвестициялар өсімінің қарқыны жағынан ел бойынша көш бастап тұр. Алғаш рет жобалар санына емес, олардың сапасына, іске қосу мерзімдеріне және өңірдің әлеуметтік-экономикалық дамуына қосатын нақты үлесіне басымдық берілді. Бұл ретте инвестициялардың 70 пайызы – жеке инвестициялар. Негізгі қаржы салынатын бағыттар – өңдеуші өнеркәсіп, агроөнеркәсіптік кешен, энергетика және инфрақұрылым.
Ақмола облысының жолаушылар көлігі және автомобиль жолдары басқармасының басшысы Владимир Кулаковтың айтуынша, жыл бойы автомобиль жолдарын салу және жөндеу бойынша ауқымды жұмыстар атқарылды. 15–25 жыл бойы жөндеу көрмеген учаскелерге ерекше назар аударылды. Жыл басынан бері барлығы 900 шақырым автожол салынды және жөнделді, оның ішінде 374 шақырымы – республикалық маңызы бар жолдар.
«Инвестициялар салық базасын кеңейтеді, ал бұл экономиканың тұрақты дамуына тікелей әсер етеді. Инвестициялар тарту бойынша белсенді өңірлер – Көкшетау қаласы, Бурабай және Целиноград аудандары. Ақкөл ауданының да әлеуеті жоғары. Оң мысал ретінде Ерейментау ауданының Тұрғай ауылында мал шаруашылығы кешенінің іске қосылуын атап өтуге болады, мұнда 7,5 мың бас ірі қара әкелінді», – деп атап өтті Марат Ахметжанов.
Өңір басшысы кәсіпкерлік және өнеркәсіп басқармасына аудан және қала әкімдерімен бірлесіп индустриялық аймақтар аумағында құрылыс-монтаж жұмыстарын бастау және инвесторларды тарту үшін қажетті инфрақұрылымды құруды, сондай-ақ ауыл шаруашылығы өнімдерін қайта өңдеуге ерекше көңіл бөлуді тапсырды.
Жолаушылар көлігі және автомобиль жолдары басқармасына 2026 жылғы 1 мамырға дейін жол активтерінің сапасы жөніндегі ұлттық орталықтың филиалы анықтаған ескертулерді жою, сондай-ақ қысқы кезеңде автомобиль жолдарын тиісті деңгейде күтіп-ұстау жұмыстарын тұрақты түрде жүргізу тапсырылды.