Ауыл спортының өркендеуі: Целиноград ауданы «AUYL SPORT – 2025» турнирінде алдыңғы қатарда

2025 жылғы 2–7 қараша аралығында Алматы қаласында ауылдық жерлерден келген балалар арасында «AUYL SPORT – 2025» республикалық турнирі өтуде. Бұл додаға Қазақстанның барлық өңірлерінен келген қатысушылар жиналды.

Турнирге еліміздің түкпір-түкпірінен келген ауылдық жерлердің 1500-ден астам жас спортшылары қатысуда. Іріктеу кезеңдері Қазақстанның 300-ден астам ауылында өткізілді, және тек үздіктер ғана өз өңірлерін республикалық деңгейде таныстыру мүмкіндігіне ие болды.

Жарыстар жеті спорт түрі бойынша өтуде: футбол, волейбол, баскетбол, бокс, еркін күрес, каратэ және үстел теннисі. Бұл турнирдің басты ерекшелігі — мұнда кәсіби спортшылар емес, өз үйлерінде, аулаларында немесе мектеп залдарында жаттығатын қарапайым ауыл балалары бақ сынайды.

Жарыс қорытындысы бойынша Целиноград ауданының спортшылары лайықты нәтиже көрсетті.

Бокс бойынша турнирдің күміс жүлдегерлері Садық Нұрислам (58 кг) пен Асемханов Айсұлтан (61 кг) атанды.

Ал еркін күрес бойынша Өмірхан Әділ 57 кг салмақ дәрежесінде чемпион атанды!

Сонымен қатар, чемпионды дайындағаны үшін Ахтанов Берік Даулетұлы «AUYL SPORT – 2025» республикалық турнирінің ең үздік жаттықтырушысы деп танылды.

Біз еркін күрес жаттықтырушысы Ахтанов Берік Даулетұлын және бокс жаттықтырушысы Масабаев Мирас Шоканұлын кәсібилігі, еңбексүйгіштігі және ауыл спортының дамуына қосқан үлесі үшін құттықтаймыз.

Барлық спортшылар мен бапкерлерге жаңа жеңістер, өз күштеріне сенім және биік спорттық белестерді бағындыруды тілейміз!