Целиноград ауданында ҚР Конституциясының 30 жылдығына арналған салтанатты іс-шара өтті

Целиноград ауданында «Ата Заң – Ел Тірегі» атты Қазақстан Республикасы Конституциясының 30 жылдығына арналған салтанатты іс-шара ұйымдастырылды. Мерекелік жиынға еңбек ұжымдарының өкілдері, ардагерлер, жастар мен аудан тұрғындары қатысты.

Аудан әкімі Дарын Сабырғалиұлы құттықтау сөзінде елдің негізгі Заңының маңыздылығына тоқталды:

«Баршаңызды еліміздің ең ұлық мерекелерінің бірі – Конституция күнімен шын жүректен құттықтаймын! Бұл мереке – тәуелсіздігіміздің, бірлігіміз бен әділдігіміздің нышаны, мемлекетіміздің тұрақтылығы мен келешегінің кепілі. Мемлекет басшысы Қасым-Жомарт Тоқаевтың тікелей қолдауымен ауданда халықтың тұрмыс сапасын арттыруға бағытталған ауқымды жобалар жүзеге асуда. Туған өлкеміздің дамуына өз еңбегі мен бастамашылдығын қосып жүрген баршаңызға ризашылығымды білдіремін», – деді аудан әкімі.

Қазақстан Республикасы Президентінің Жарлығына сәйкес ауданымызда 5 көпбалалы ана «Алтын алқа» және «Күміс алқа» мемлекеттік наградаларына ие болды.

Сонымен қатар, ауданның әлеуметтік-экономикалық дамуына қосқан зор үлесі, табысты еңбегі мен кәсіби біліктілігі үшін аудан әкімі атынан түрлі ұйымдар мен мекемелердің өкілдері төс белгілерімен, Құрмет грамоталарымен және алғыс хаттармен марапатталды.

Мерекелік іс-шара аудандық Мәдениет үйі шығармашылық ұжымдарының концерттік бағдарламасымен жалғасып, көрермендерге көтеріңкі көңіл-күй сыйлады.