Целиноград ауданында «Целиноград Су Арнасы» қызметкерлері марапатталды

Жұмысшы мамандықтар жылы аясында Целиноград ауданында Қазақстан Республикасының Су шаруашылығы қызметкерлері күніне арналған салтанатты іс-шара өтті. Мереке саланың маңызды мамандарына деген алғыс пен құрмет атмосферасында ұйымдастырылды.

Саланың ардагерлері мен «Целиноград Су Арнасы» ШЖҚ МКК мекемесінің қызметкерлерін кәсіби мерекемен аудан әкімі Дарын Сабырғалиұлы құттықтады. Өз сөзінде ол су шаруашылығы саласындағы жүйелі және сенімді жұмыстың артында күнделікті, тиянақты әрі күрделі еңбек тұрғанын атап өтті.

«Сіздер - стратегиялық ресурс - судың шынайы сақшыларысыздар. Ауданымыздағы мыңдаған тұрғынның жайлы өмірі мен әл-ауқаты сіздердің жауапкершіліктеріңізге, кәсіби шеберліктеріңізге және жанқиярлықтарыңызға тікелей байланысты», - деді аудан әкімі өз құттықтауында.

Мамандыққа адалдығы мен адал еңбегі үшін сала үздіктері медальдармен, төсбелгілермен, аудан әкімінің және «Целиноград Су Арнасы» басшылығының алғыс хаттарымен марапатталды.

Саланың ардагерлеріне де ерекше құрмет көрсетілді. Көптеген ардагерлер су шаруашылығы саласының іргетасын қалаушылардың бірі болды. Олардың мол тәжірибесі мен еңбегі бүгінгі кәсіби буынға сенімді тірек болып отыр.

Салтанатты жиынның соңы аудандық мәдениет үйінің шығармашылық ұжымдары дайындаған концерттік бағдарламамен түйінделді. Әндер, жүрекжарды лебіздер, музыкалық нөмірлер — барлығы да көзге көрінбейтін, бірақ қоғам өмірінде шешуші рөл атқаратын мамандарға деген алғыс пен құрметтің белгісіне айналды.