Бюджетті атқару тиімділігіне арналған дөңгелек үстел өтті

Сандықтау ауданы әкімдігінде Ақмола облысы бойынша мемлекеттік аудит тобының жетекшісі Жанат Естаулетовтың ұйымдастыруымен «дөңгелек үстел» өтті. Іс-шараның тақырыбы – салықтық әкімшілендірудің тиімділігіне, жергілікті бюджетке түсімдердің толықтығы мен уақытылы түсуіне, сондай-ақ облысты дамыту жоспары мен бюджеттік бағдарламалардың іске асырылуына жүргізілген мемлекеттік аудит барысында жиі анықталатын заңбұзушылықтар болды.
«Дөңгелек үстел» жұмысына ревизиялық комиссияның мемлекеттік аудиторлары, бюджеттік бағдарламалар әкімшілерінің басшылары мен бухгалтерлік қызметкерлері, сондай-ақ Сандықтау ауданының қарамағындағы мемлекеттік мекемелер мен кәсіпорындардың өкілдері қатысты.
Талқылаудың негізгі тақырыптары бюджеттік бағдарламаларды жоспарлау мен іске асыру, сондай-ақ бюджетті орындау барысында жиі жіберілетін қателіктер мен заңбұзушылықтар болды. Қатысушылар бюджеттік заңнама талаптарының, сондай-ақ бухгалтерлік есеп пен қаржылық есептілік саласындағы заңнама нормаларының жиі бұзылатын жағдайларын қарастырды.
Әсіресе жоспарлаудың сапасын арттыру, бюджеттік міндеттемелерді уақытылы орындау және мемлекеттік қаражатты пайдаланудағы ашықтықты қамтамасыз ету қажеттілігіне ерекше назар аударылды.
Мұндай кездесулер қаржы-бюджеттік тәртіптің нығаюына, сондай-ақ бюджеттік қаражат пен активтерді тиімді және нысаналы пайдалану үшін жауапкершіліктің артуына ықпал етеді.