Первомайка ауылында су құбыры желілерінің құрылысы аяқталуда

Астрахан ауданының Первомайка ауылында маңызды инфрақұрылымдық жоба – су құбыры желілерінің құрылысы жүзеге асырылып жатыр. Жұмысты мердігер ұйым «Ақ Нұр Астана 2005» ЖШС атқаруда.

Халқы мыңнан асатын ауыл таяу уақытта таза ауыз сумен тұрақты түрде қамтамасыз етілетін болады. Жергілікті атқарушы органдардың мәліметінше, бүгінде негізгі жұмыстар аяқталды: ауылішілік желілер тартылып, сорғы станциясының ғимараты салынды, қоршау орнатылды, негізгі су құбыры жүргізілді.

Жүйенің іске қосылуы ауыл тұрғындарының өмір сүру деңгейін айтарлықтай жақсартып, санитарлық жағдай мен халықтың денсаулығына оң әсерін тигізбек. Сондай-ақ, елді мекеннің әлеуметтік-экономикалық дамуына жаңа серпін береді.

Жобаның орындалуы аудан әкімдігінің тұрақты бақылауында. Нысанды пайдалануға беру жақын уақытта жоспарланып отыр.

Осылайша, Первомайка тұрғындары үшін орталықтандырылған су жүйесінің іске қосылуы көптен күткен мәселенің шешімі болып, ауылдың дамуына жаңа мүмкіндіктер ашады.