Шортанды ауданында су құбыры жүйесін дамыту бойынша ауқымды жұмыс жалғасуда

Шортанды ауданында тұрғындарды сапалы ауыз сумен қамтамасыз етіп, ауылдар мен кенттердегі өмір сүру жағдайын жақсартуға бағытталған су құбыры жүйесін дамыту бойынша ауқымды жұмыс жүргізілуде. Бұл бағыттағы бірнеше ірі нысан бір мезетте ГУ «Құрылыс бөлімі» бақылауында тұр, әрқайсысы бойынша айтарлықтай ілгерілеу бар, деп хабарлады Ақмола облысының энергетика және ТКШ басқармасы.

Ключи ауылында «Су құбырын және су тарату желілерін салу» жобасы жүзеге асырылуда. Бас мердігер – Ақтау қаласындағы «Альянс ЛТД» ЖШС. Бүгінгі таңда жұмыстың негізгі бөлігі аяқталды: жоспарланған 20,5 шақырымның 20 шақырымы төселді, екі пайдалану ұңғымасы бұрғыланды, 9 шақырым ауылішілік су желісі жүргізілді және сорғы станцияларына электр беру желілері тартылды. Қазіргі уақытта жаңа жүйенің маңызды бөлігі саналатын екінші көтеру сорғы станциясын орнату жұмыстары аяқталуға жақын.

Аудан орталығы – Шортанды кентінде су құбыры желілерін қайта жаңарту жобасы толық аяқталды. Жұмысты Шымкент қаласының «УниверсалСтройСервис» ЖШС атқарды. Мұнда 18 шақырым су құбыры жаңартылып, пайдалану ұңғымалары бұрғыланды, нысан пайдалануға берілді. Бұл тұрғын үйлер мен әлеуметтік нысандарды сенімді сумен қамтамасыз етуге мүмкіндік береді.

Тағы бір ірі жоба Бозайғыр ауылында жүріп жатыр. Бас мердігер – Талдықорған қаласындағы «Көлсай Строй» ЖШС. Қазірдің өзінде 6,4 шақырым су құбыры төселіп, екі ұңғыма бұрғыланды, бірінші және екінші көтеру сорғы станциялары электр желісіне қосылды. 4,8 шақырым ауылішілік су желісі тартылып, резервуарларды бетондау және аумақты қоршау жұмыстары жүргізілуде. Соңғы кезеңде – сорғы станциясын монтаждау жұмыстары атқарылуда.