Ақмола облысында ауылдық елді мекендерді сапалы ауызсумен қамтамасыз етуге бағытталған ауқымды жоба жүзеге асырылуда. Бүгінде өңірдің 36 ауылында су құбырларын салу және қайта жаңарту жұмыстары жүргізілуде, олардың 28-і заңсыз активтерді қайтару есебінен қаржыландырылып отыр. Осы мақсатқа арнайы мемлекеттік қордан 21,5 миллиард теңге бөлінді. Қаражаттың негізгі бөлігі Зеренді ауданының ауылдарын ауызсумен қамтамасыз етуге бағытталған.
Маңызды нысандардың бірі – Өркен ауылындағы жоба. Мұнда мыңнан астам адам тұрады. Бұған дейін ауыл тұрғындары ауыз суды сырттан тасып пайдалануға мәжбүр болды. Ағымдағы жылдың көктемінде ауылда жаңа су құбырын тарту жұмыстары басталды. Жобаны жүзеге асыруға арнайы қордан 1,4 миллиард теңгеден астам қаржы бөлінді.
Жоба аясында ауылда ұзындығы шамамен 30 шақырым болатын жаңа су құбыры салынып, 420 абонент орталықтандырылған жүйеге қосылады. Су екі ұңғымадан алынып, санитарлық талаптарға сай бес сатылы сүзгіден өткізіледі. Қазіргі таңда мердігерлік ұйым құбырдың жартысынан көбін төседі, құрылысқа 10 техника мен 23 маман жұмылдырылған. Жұмыстар 2025 жылдың соңына дейін толық аяқталады деп жоспарлануда.
Ауыл тұрғындары жобаның өмір сүру сапасын арттыру үшін маңыздылығын атап өтеді. «Енді біз таза ауызсуға тұрақты қол жеткіземіз, бұл әсіресе балалар мен болашақ ұрпақтың денсаулығы үшін өте маңызды», – дейді жергілікті тұрғындар.
Жалпы Зеренді ауданында 2025 жылы су құбырларын салу және жаңарту бойынша 13 жоба жүзеге асырылып жатыр. Оған 8,5 миллиард теңге қарастырылған, оның 6 миллиард теңгеден астамы арнайы қордан бөлінді.
Облыс әкімдігінің мәліметінше, жыл соңына дейін барлық су жобалары аяқталады. Сонымен қатар, 42 шағын ауылда кешенді блок-модуль станциялары орнатылады. Осы шаралардың нәтижесінде 2025 жылдың соңына дейін өңір халқының 100 пайызы сапалы ауызсумен қамтамасыз етіледі.