Облыстың мектептерінде оқушылардың қаржылық сауаттылығы бойынша ашық сабақтар өтті

24-27 қаңтар аралығында Ақмола облысының 492 жалпы білім беретін мектебінде 95 мыңға жуық оқушыға қаржылық қауіпсіздік бойынша ашық сабақтар өткізілді. Аталған іс-шаралар «Біртұтас тәрбие» тұжырымдамасын іске асыру шеңберінде ұйымдастырылды. Тұжырымдамада  қаңтар айы «Заң және тәртіп» бағытына арналған.

Ақпараттық жұмысты Ақмола облысы бойынша Экономикалық тергеп-тексеру департаменті Ақмола облысының білім басқармасымен бірлесіп ұйымдастырды.

Іс-шараның негізгі мақсаты-оқушылардың заманауи қаржылық тәуекелдер туралы хабардарлығын арттыру және олардың қаржылық сауаттылығын дамыту.

Ұйымдастырушылардың айтуынша теориялық материалдар мен бейнероликтер қатысушылардың материалдық мүлкін түрлі қиыншылықтардан: жоғалту, бүліну, ұрлық, алаяқтық және басқа да тәуекелдерден қорғау мәселелеріне бағытталған.

Материал оқушылардың әр жас санаты үшін жеке есептелген:

- 5-7 сыныптар үшін «Цифрлық гигиена» тақырыбы;

- 8-9 сыныптар үшін «Алаяқтық және онлайн-шопинг»тақырыбы;

- 10-11 сыныптар үшін «Дропперлер» тақырыбы анықталды.

Теориялық материалды Ыбырай Алтынсарин атындағы Ұлттық білім академиясы ҚР Қаржы мониторингі агенттігі мамандарының қатысуымен әзірледі.