АҚМОЛА ОБЛЫСЫНЫҢ КОЛЛЕДЖ ПЕДАГОГТАРЫ РЕСПУБЛИКАЛЫҚ СПАРТАКИАДАДА КҮМІС ЖҮЛДЕГЕР АТАНДЫ

Шымкент қаласында колледж қызметкерлері мен педагогтері арасында өткен республикалық Спартакиадада Ақмола облысының құрамасы жалпыкомандалық есепте екінші орынды иеленіп, күміс медаль жеңіп алды.

Республикалық жарысқа еліміздің 16 өңірінен келген үздік командалар қатысып, тоғыз спорт түрі бойынша өзара бақ сынасты. Спартакиада бағдарламасына шағын футбол, ерлер және әйелдер волейболы, үстел теннисі, тоғызқұмалақ, арқан тарту, баскетбол, бес асық және асық ату спорт түрлері енгізілді.

Ақмола облысының намысын қорғаған 51 қатысушы жоғары дайындық деңгейін, жеңіске деген жігерін және командалық бірліктің үлгісін көрсетті. Әрбір спортшының қосқан үлесі жалпы нәтижеге әсер етіп, команданы жеңіс тұғырына жақындатты.

Спартакиаданың ерекше ерекшеліктерінің бірі – команда мүшелерінің өзара қолдауы мен ұйымшылдығы болды. Өз жарыстарынан бос уақытта қатысушылар әріптестеріне жанкүйер болып, барлық спорт алаңдарында белсенді қолдау көрсетті. Осындай бірлік пен ынтымақ команданың жоғары нәтижеге жетуіне үлкен серпін берді.

Сонымен қатар, облыс құрамасы оқу орындары мен колледж директорларының қолдауын ерекше атап өтті. Педагогтер мен қызметкерлерге республикалық деңгейдегі жарысқа қатысуға мүмкіндік берген білім беру ұйымдарының басшыларына алғыс білдірілді.

Ақмола облысы құрамасының республикалық Спартакиададағы күміс жүлдесі – өңір педагогтерінің кәсіби ғана емес, спорттық әлеуетінің де жоғары екенін көрсететін маңызды жетістік.