Көкшетауда «ақ дақтар» азайып келеді! Бұрын байланыс ұстамайтын аймақтар енді қолжетімді бола бастады.

Сіз «ақ дақтар» деген не екенін ойланып көрдіңіз бе? Жоқ, бұл киімдегі іздер немесе жер бедерінің ерекшеліктері туралы емес. Цифрлық әлемде «ақ дақ» — бұл мобильді байланыс іс жүзінде жоқ аймақтар. Яғни, сигнал әлсіз болып, маңызды қоңырау шалу, хабарлама жіберу немесе интернетті пайдалану мүмкін болмайтын орындар.
Мұндай аймақтарды жою — қалалық инфрақұрылымды дамытудың маңызды бағыттарының бірі. 2024–2025 жылдары жүргізілген мониторинг нәтижесінде Көкшетау қаласында «КаР-Тел» ЖШС желісінде осындай 12 учаске анықталды.
Оператордың желіні дамытуға бағытталған белсенді жұмысының және тұрғындардың сұраныстарына жедел жауап беруінің арқасында 2025 жылы 9 «ақ дақ» толық жойылды. Бұл мыңдаған абонент үшін байланыс сапасын арттырып, қамту аумағын едәуір кеңейтті.
Бұл бағыттағы жұмыстар 2026 жылы да жалғасуда. Тиімді өзара іс-қимылдың жарқын мысалы — Галочья төбесі шағынауданындағы мәселенің шешілуі.
Көкшетау қаласының әкімдігі мен Цифрландыру және архивтер басқармасының қолдауымен «КаР-Тел» ЖШС антенна-мачталық құрылымды (АМҚ) салуды аяқтады. Қазіргі таңда нысан толық пайдалануға беріліп, қалыпты режимде жұмыс істеп тұр. Шағынаудан тұрғындары тәулік бойы сапалы мобильді байланыс пен жоғары жылдамдықты интернетке қол жеткізді.