Интеллект дәуіріндегі Қазақстан: Президент жасанды интеллект туралы заңға қол қойды

Мемлекет басшысы Қасым-Жомарт Тоқаев «Жасанды интеллект және цифрландыру мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» Заңға қол қойды. Бұл қадам елдің цифрлық саласын реттеу мен дамытудағы маңызды кезең болып саналады.

Қол қойылған заң «Жасанды интеллект туралы» Заңның нормаларын толықтырып, күшейте отырып, жасанды интеллектті қауіпсіз, ашық және этикалық тұрғыдан пайдалануға бағытталған бірқатар негізгі қағидаларды енгізеді:
1. Танылуы және жауапкершілік: ЖИ жүйелері ресми түрде ақпараттандыру объектілері ретінде танылады. Сонымен қатар басты қағида бекітіледі: жүйені пайдалану кезіндегі барлық тәуекелдер мен жауапкершілік ЖИ жүйелерінің иелеріне, иеленушілеріне және пайдаланушыларына жүктеледі.
2. Адамды қорғау: Адамға манипулятивті ықпал ететін, жеке деректер туралы заңнаманы бұзатын немесе өзге де қауіпті әрекеттерге қабілетті ЖИ жүйелерін жасауға және қолдануға тыйым енгізілді.
3. Жұмыс қағидаттары: ЖИ қызметінің негізгі қағидаттары заңда бекітілді: заңдылық, әділдік, ашықтық, түсіндірілуі және адамның игілігіне басымдық беру.
4. Тұтынушы үшін ашықтық: Сенімділікті арттыру мақсатында жасанды интеллект технологиялары қолданылған тауарлар, жұмыстар мен көрсетілетін қызметтерді міндетті түрде белгілеу талабы енгізілді.
5. Дамуға арналған платформа: Заң жаңа ЖИ модельдерін әзірлеуге, оқытуға және қауіпсіз тестілеуге мүмкіндік беретін реттелген орта — Ұлттық жасанды интеллект платформасын құрудың құқықтық негізін қалыптастырады.

Бұл заңға қол қою мемлекеттік басқару, бизнес және әлеуметтік салада инновациялық технологияларды енгізудің берік құқықтық базасын қамтамасыз етеді. Ол цифрлық экономиканы дамытуды жеделдетіп қана қоймай, қарқынды технологиялық өзгерістер жағдайында азаматтардың құқықтары мен бостандықтарын қорғауды да қамтамасыз етеді.

Қазақстан жасанды интеллект саласында этикалық және жауапты саясатты ұстана отырып, Орталық Азия өңірінде көшбасшы болуға деген айқын ұмтылысын көрсетуде.