Баршаға арналған құқықтық көмек: Қазақстанда робот-кеңесші іске қосылды

Қазақстан Республикасы Үкіметінің 2025 жылғы 1 ақпандағы № 200 қаулысымен бекітілген 2025–2030 жылдарға арналған заң мен тәртіп идеологиясын ілгерілету жөніндегі тұжырымдаманы іске асыру бойынша іс-қимыл жоспарына сәйкес, халықтың құқықтық сауаттылығы мен мәдениетін арттыруға бағытталған бірқатар бастамалар жүзеге асырылуда.

Осы бағыттағы маңызды қадамдардың бірі — Қазақстан Республикасы Әділет министрлігі әзірлеген “Робот-кеңесші” чат-ботын енгізу болды.

Бұл не?

Робот-кеңесші — бұл ыңғайлы онлайн форматта тегін құқықтық кеңес беретін сервис. Әсіресе, құқықтық қызметтерге қолжетімділігі шектеулі шалғай ауыл тұрғындары үшін аса өзекті құрал.

Қалай пайдалануға болады?
1. Келесі сайттардың біріне кіріңіз:
🔹 adilet.kz
🔹 eup.adilet.gov.kz
2. Экранның төменгі сол жақ бұрышындағы робот белгішесін басыңыз.
3. Қызықтырған сұрағыңызды қойып, онлайн форматта жауап алыңыз.

Неліктен бұл маңызды?

✔️ Азаматтардың тұратын мекенжайына қарамастан құқықтық ақпаратқа қолжетімділігі
✔️ Құқықтық мәдениетті арттыру
✔️ Заңгерге жеке бармай-ақ кеңес алу мүмкіндігі
✔️ Құқықтық сауатсыздықты азайту — қоғамда заң үстемдігін нығайтудың маңызды қадамы

Ақпараттық қолдау көрсетуге шақырамыз

Азаматтардың, әсіресе шалғай және қиын қолжетімді елді мекен тұрғындарының, бұл мүмкіндік туралы хабардар болуын арттыру мақсатында Әділет департаменті ақпараттық бейнероликтер әзірледі.
Облыстық, аудандық және ауылдық округ әкімдіктерінен осы бейнематериалдарды ресми сайттары мен әлеуметтік желілерде жариялауға қолдау көрсетулерін сұраймыз.

Құқықтық сауаттылық — әділетті әрі мықты қоғамның іргетасы. Білімді баршаға қолжетімді етейік!