Радикалды идеяларға қарсы – қуатты сөз

Денисов ауданында діни экстремизмнің алдын алу – бір реттік шара емес, жүйелі әрі жан-жақты жүргізілетін жұмыс. Мұнда мамандар радикалды көзқарастарға қарсы тұрудың ең тиімді жолы – ашық диалог пен сенімді әңгіме екеніне сенімді.
Бұл маңызды міндетті аудандық ақпараттық-түсіндіру тобы жүзеге асырып келеді. Оның құрамында ішкі саясат және полиция қызметкерлері, ауыл әкімдері, учаскелік инспекторлар, педагогтар, сондай-ақ қоғам арасында беделі бар пікір көшбасшылары бар. Әртүрлі сала өкілдерінің басын қосқан мұндай топ тұрғындармен кез келген деңгейде тіл табысуға мүмкіндік береді.
Топ мүшелері тұрақты түрде кездесулер, сұхбаттар және тақырыптық іс-шаралар ұйымдастырады. Бұл басқосуларда қоғамды алаңдатқан өзекті мәселелер қозғалып, діни сауаттылық, заманауи қауіп-қатерлер мен радикалды идеялардың алдын алу жолдары кеңінен талқыланады. Осындай жұмыстардың нәтижесінде қоғамда сыни ойлау қалыптасып, деструктивті ағымдарға қарсы тұра алатын берік «иммунитет» пайда болады.
Бұл бағытта спикерлердің рөлі ерекше. Олар тек ақпарат жеткізуші ғана емес, аудиториямен байланыс орната білетін, ойды әсерлі жеткізетін мамандар. Осы орайда олардың кәсіби деңгейін арттыру мақсатында аудан көлемінде жыл сайын «Ақпараттық-түсіндіру тобының үздік спикері» байқауы өткізіледі.
Аталған байқау тәжірибе алмасу мен кәсіби дамудың маңызды алаңына айналды. 2025 жылдың қорытындысы бойынша байқауға бірнеше ауылдық округтің өкілдері қатысып, өз жұмыстарын ұсынды. Қатысушылардың еңбектерін мемлекеттік органдар, үкіметтік емес ұйымдар және бұқаралық ақпарат құралдарының өкілдерінен құралған комиссия бағалады.
Нәтижесінде Денисовка ауылының тұрғындары Наталья Балабай мен Таймас Астаев, сондай-ақ Крымское ауылының өкілі Сауле Салкимбаева жеңімпаз атанды. Олардың еңбегі алғыс хаттармен және естелік сыйлықтармен марапатталды.
Мұндай бастамалардың маңызы тек марапаттаумен шектелмейді. Олар өзгелерге үлгі болып, ақпараттық-түсіндіру жұмыстарының маңызын арттырады және қоғамда тұрақтылық пен келісімді нығайтуға үлес қосады.
Жоба Қостанай облысы психологтарының қауымдастығы қоғамдық қорының ұйымдастыруымен, аудандық әкімдіктің ішкі саясат бөлімінің тапсырысы бойынша жүзеге асырылды. Мамандардың айтуынша, бұл бағыттағы жұмыс алдағы уақытта да жалғасын табады, өйткені қоғамдық келісім мен тұрақтылық – әрқашан басты назарда болатын құндылық.

Материал Қостанай облысы бойынша ТҚК
аппаратының ақпараты негізінде дайындалды