УНИВЕРСИТЕТ ЖАСТАРЫМЕН ӨТКЕН МАЗМҰНДЫ КЕЗДЕСУ

Х.Досмұхамедов атындағы Атырау университетінде Атырау облысы Дін істері басқармасының қолдауымен және «Жәрдем-Атырау» корпоративтік қорының ұйымдастыруымен «Дін мен қоғам: жастардың зайырлы ұстанымы» тақырыбында кездесу өтті.

Іс-шараның мақсаты – студент жастардың діни сауаттылығын арттыру, радикалды идеологияның алдын алу және зайырлы мемлекеттің қағидаттарын түсіндіру.

Кездесуді “Жәрдем-Атырау”КҚ-ның директоры орынбасары Құбышев Мейірбек Ғайнеденұлы ашып, қатысушыларды шараның мақсатымен таныстырды. Ол өз сөзінде жастардың санасына діни және ұлттық құндылықтарды дұрыс сіңірудің маңыздылығын атап өтті.

Кездесуге «Шапағат» деструктивтік діни ағымдардан жапа шеккендерге көмек орталығы» қоғамдық қорының теологы, АТТ мүшесі Күмісбек Думан Асқарұлы, Атырау облысы Дін істері басқармасының «Ақпараттық-талдау орталығы» КММ-нің заңгер маманы Табарак Бейбіт Берікұлы және «Жәрдем-Атырау» корпоративтік қорының маманы, АТТ мүшесі, “Жусан” операциясымен елге оралған азаматша Шалабаева Самал Амангелдіқызы қатысты.

Теолог Думан Асқарұлы өз сөзінде деструктивтік діни ағымдардың қоғамға тигізер залалы мен олардың жастарды арбау тәсілдері туралы айтып өтті. Ол дәстүрлі ислам мен радикалды идеологияның айырмашылығын нақты мысалдармен түсіндіріп, жастарды діни ақпаратты тек ресми, сенімді дереккөздерден алу керектігін ескертті.

Заңгер Бейбіт Берікұлы діни сенім бостандығын қамтамасыз ететін Қазақстан Республикасының заңнамалық негіздеріне тоқталды. Ол жастарға діни бірлестіктердің қызметі мен құқықтық жауапкершілік туралы түсіндіріп, заңсыз діни әрекеттерге қатысудың салдарын нақтылап өтті.

Ал Самал Амангелдіқызы өз сөзінде зайырлылық ұғымының мәнін ашып, оның қоғамдағы тұрақтылық пен толеранттылықты сақтаудағы рөліне тоқталды. Сондай-ақ ол өз өмір жолындағы басынан өткен жағдайлармен бөлісіп, жастарды қоғам өміріне белсенді араласуға, құндылықтарды құрметтеуге шақырды.

Кездесу соңында арнайы бейнеролик ұсынылып, студенттер мамандарға көкейлеріндегі сұрақтарын қойып, пайдалы кеңестер алды.