ТЕРРОРИЗМГЕ ҚАРСЫ КҮРЕС ЖӘНЕ ҰЛТТЫҚ ҚҰНДЫЛЫҚТАРДЫ САҚТАУ

Сауран ауданы білім бөліміне қарасты А.Байтұрсынов атындағы жалпы орта мектебінің ұжымына «Терроризмге қарсы күрес және ұлттық құндылықтарды сақтау» тақырыбында ақпараттық-түсіндіру жұмыстары жүргізілді.
Кездесуге облыстық білім басқармасының мамандары, терроризмге қарсы комиссиясының және ақпараттық насихаттық топ мүшелері қатысты.
Шараның басты мақсаты – мектеп ұжымының терроризм мен экстремизмнің қоғамға тигізетін зияны туралы түсінігін кеңейту, олардың алдын алу жолдарын насихаттау, сондай-ақ ұлттық құндылықтарды дәріптеу арқылы жас ұрпақтың бойында отансүйгіштік пен бірлік сезімін қалыптастыру болып табылады.
Жиын барысында мамандар терроризмнің мәні, түрлері және белгілері жөнінде баяндап, төтенше жағдай орын алған кезде дұрыс әрекет ету алгоритмін түсіндірді.
Сонымен қатар экстремизмнің қоғамдағы тұрақтылыққа тигізетін кері әсерлері нақты мысалдармен жеткізілді.
Ұлттық құндылықтар тақырыбында қатысушыларға салт-дәстүрдің, тіл мен ділдің, тарих пен мәдениеттің жастар тәрбиесіндегі орны жайлы айтылып, елдік бірлікті сақтау – терроризм мен жат идеологияға қарсы ең үлкен күш екендігі баса көрсетілді.
Кездесу барысында бейнематериалдар көрсетіліп, ақпараттық жадынамалар таратылды.
Қатысушылар көкейдегі сұрақтарын қойып, мамандардан толыққанды жауаптар алды.
Шара соңында арнайы келген қонақтар терроризмге қарсы күрес – барша қоғамның ортақ міндеті екенін айта келе, әрбір азаматты ұлттық құндылықтарды дәріптеп, жас ұрпақты тәрбиелеуде үлгі болуға шақырды.

Материал Түркістан облысы бойынша ТҚК аппаратының ақпараты негізінде дайындалды