Мемлекеттік қызмет саласында сыбайлас жемқорлыққа қарсы мәдениетті қалыптастыру
Жетісу облысы әкімінің аппаратында заңдылық пен құқықтық тәртіпті сақтаудың өзекті мәселелеріне арналған маңызды семинар өтті. Іс-шара Қазақстан Республикасы Президентінің «Әділетті Қазақстан: заң мен тәртіп, экономикалық өсім, қоғамдық оптимизм» Жолдауы аясында ұйымдастырылды.
Семинарға облыстық басқармалардың, Жетісу облысы әкімі аппаратының, сондай-ақ аудандық әкімдіктердің басшылары мен қызметкерлері қатысты. Негізгі мақсат мемлекеттік қызмет саласындағы заңнаманы қатаң сақтау, сыбайлас жемқорлыққа тиімді қарсы іс-қимыл жасау және мемлекеттік қызметшілердің Әдеп кодексін мүлтіксіз орындау мәселелерін жан-жақты талқылау болды.
Баяндамамен Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Жетісу облысы бойынша департаментінің Превенция басқармасының басшысы Асқар Арыстан сөз сөйледі.
Өз баяндамасында ол ҚР Сыбайлас жемқорлыққа қарсы саясат тұжырымдамасын 2022-2026 жылдарға арналған кезеңде іске асырудың айрықша маңыздылығын атап өтіп, сыбайлас жемқорлыққа қарсы заңнамадағы новеллалар мен өзгерістер туралы түсіндірді.
Сыбайлас жемқорлыққа қарсы іс-қимыл туралы ҚР Заңының негізгі аспектілеріне егжей-тегжейлі тоқталды. Сыбайлас жемқорлыққа төзбеушілікті көрсететін құндылықтар жүйесін қоғамда сақтауға және нығайтуға бағытталған іс-шара ретінде сыбайлас жемқорлыққа қарсы мәдениетті қалыптастырудың маңыздылығы атап өтілді. Спикер Қазақстандағы сыбайлас жемқорлыққа қарсы іс-қимылдың стратегиялық рөлі туралы толық айтып берді.
Сыбайлас жемқорлық тәуекелдерін азайту және алдын алу шараларына ерекше назар аударылды:
- Мемлекеттік қызметтерді цифрландыру: азаматтардың лауазымды тұлғалармен тікелей байланысын азайту үшін қызметтерді барынша онлайн режимде көрсету, бұл сыбайлас жемқорлық мүмкіндіктерін азайтады.
- Сыбайлас жемқорлық тәуекелдерін талдау: мемлекеттік органдар мен квазимемлекеттік сектор субъектілері сыбайлас жемқорлық құқық бұзушылықтарына ықпал ететін себептер мен жағдайларды анықтау және жою үшін жүргізеді.
Семинар Жетісу облысының мемлекеттік қызметшілері арасында тәжірибе алмасу және сыбайлас жемқорлыққа қарсы қағидаттарды нығайту үшін маңызды алаң болды.